(ភ្នំពេញ) គម្រោងសាងសង់ហេដ្ឋារចនាសម្ព័ន្ធជាច្រើន ត្រូវបានថ្នាក់ដឹកនាំតាមក្រសួង និងរាជរដ្ឋាភិបាលកម្ពុជា អនុម័តជាបន្តបន្ទាប់ ដើម្បីធ្វើយ៉ាងណាសម្រួលដល់ការរស់នៅរបស់ប្រជាពលរដ្ឋ លើកស្ទូយមុខមាត់ប្រទេស និងជំរុញឲ្យសេដ្ឋកិច្ចជាតិកាន់តែរីកចម្រើន។ ដូច្នេះសូមមកដឹងទាំងអស់គ្នាថា តើកម្ពុជាមានគម្រោងសាងសង់អ្វីខ្លះនៅប៉ុន្មានឆ្នាំខាងមុខនេះ?
១. ផ្លូវរថភ្លើងលើអាកាសពីភ្នំពេញទៅព្រែកព្នៅ (ពហុកីឡដ្ឋានមរតកតេជោ)
ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា ក្រសួងបានស្នើឱ្យអង្គការ JICA សិក្សាពីការសាងសង់ផ្លូវរថភ្លើងលើអាកាស (AGT) ពីរាជធានីភ្នំពេញ ទៅពហុកីឡដ្ឋានជាតិមរតកតេជោ ដែលស្ថិតក្នុងតំបន់អភិវឌ្ឍន៍របស់ក្រុមហ៊ុនលីយ៉ុងផាត់ ខណៈដែលកម្ពុជា នឹងធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣។
គម្រោងស្ថាបនាខ្សែរថភ្លើងលើអាកាសក្នុងរាជធានីភ្នំពេញក្រោមកម្ចីរបស់ជប៉ុនជាង ៨០០លានដុល្លារ គឺត្រូវការពេលវេលាយ៉ាងហោចណាស់ ២ឆ្នាំបន្ថែមទៀត ដើម្បីសិក្សាលម្អិត។
បើតាមគម្រោងរថភ្លើងអាកាស AGTក្នុងរាជធានីភ្នំពេញ ដែលអាជ្ញាធរ និងអ្នកជំនាញ JICA បង្ហាញនាពេលកន្លងមក ឱ្យដឹងថា គម្រោងនេះ មានប្រវែង ១៨គីឡូម៉ែត្រ រត់តាមបណ្តោយផ្លូវមួយចំនួនដូចជា៖ មហាវិថីហ្សាលដឺហ្គោល មហាវិថីព្រះមុនីរ៉េត ផ្លូវលេខ ២១៧ ផ្លូវវេងស្រេង ឆ្ពោះទៅព្រលានយន្តហោះ និង១ខ្សែទៀតបែកខ្នែងទៅផ្លូវជាតិលេខ៤ និងផ្លូវកប់ស្រូវ។
២. ផ្លូវល្បឿនលឿនពីភ្នំពេញទៅបាវិត
ហូតមកដល់ពេលនេះ ការសិក្សាផ្លូវល្បឿនលឿនពីរាជធានីភ្នំពេញ-បាវិត (ព្រំដែនកម្ពុជា-វៀតណាម) គឺបានសិក្សារួចរាល់ចប់សព្វគ្រប់អស់ហើយ ដែលត្រូវចំណាយថវិកាអស់ប្រមាណ ៣៨០០លានដុល្លារ។ នេះបើតាមការបញ្ជាក់របស់ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន។
រាជរដ្ឋាភិបាលបានអនុញ្ញាតឱ្យទីភ្នាក់ងារសហប្រតិបត្តិការអន្ដរជាតិនៃប្រទេសជប៉ុន (JICA) ធ្វើការសិក្សាផ្លូវល្បឿនលឿនពីភ្នំពេញទៅបាវិត ដែលមានចម្ងាយផ្លូវប្រវែង ១៦០គីឡូម៉ែត្រ ដើម្បីធ្វើការសាងសង់ផ្លូវនេះ។
៣. ផ្លូវល្បឿនលឿនពីភ្នំពេញទៅខេត្តព្រះសីហនុ
ផ្លូវល្បឿនលឿនពីរាជធានីភ្នំពេញ ទៅខេត្តព្រះសីហនុ បានបញ្ចប់ការសិក្សានៅចុងឆ្នាំ២០១៨ ហើយនឹងចាប់់ផ្តើមសាងសង់នៅដើមឆ្នាំ២០១៩។ ការសាងសង់នេះ គ្រោងនឹងបញ្ចប់ជាស្ថាពរនៅឆ្នាំ២០២៣ ពោលគឺប្រើរយៈពេល៤ឆ្នាំ។
ផ្លូវល្បឿនលឿននេះ មានប្រវែងជាង ១៩០គីឡូម៉ែត្រ នឹងត្រូវសាងសង់ដោយក្រុមហ៊ុនចិន China Road and Bridge Corporation ដែលចំណាយថវិកាជិត ១,៨ពាន់លានដុល្លារ។
៤.ផ្លូវល្បឿនលឿន ពីភ្នំពេញ ទៅព្រំដែនឡាវ
ផ្លូវល្បឿនលឿនពីភ្នំពេញទៅកាន់ព្រំដែនឡាវមានប្រវែង៥២២គីឡូម៉ែត្រដោយគ្រោងនឹងវិនិយោគទឹកប្រាក់ប្រមាណ៥ពាន់លានដុល្លារ។ នេះបើតាមការបញ្ជាក់ពីលោក ថ្លាំង វុទ្ធី អគ្គនាយកក្រុមហ៊ុន Globalcam បានថ្លែង ក្នុងពិធីចុះហត្ថលេខារវាងក្រុមហ៊ុន Globalcam និងក្រុមហ៊ុន Mahdi Holdings Investment ជាក្រុមហ៊ុនវិនិយោគលើគម្រោងនេះផ្ទាល់ កាលពីឆ្នាំ ២០១៧។
៥. ស្ពានឆ្លងទន្លេសាបថ្មី
បច្ចុប្បន្នសាលារាជធានីភ្នំពេញ កំពុងសាងសង់ស្ពានឆ្លងកាត់ទន្លេសាប ក្នុងភូមិសាស្រ្តខ័ណ្ឌឫស្សីកែវ រាជធានីភ្នំពេញ ទៅកាន់តំបន់ អភិវឌ្ឍជ្រោយចង្វារ មានប្រវែងជិត១គីឡូម៉ែត្រ និងទទឹងស្ពានជាង ១០ ម៉ែត្រ កាត់ទន្លេសាបម្តុំឃ្លាំងសាំងក្រុមហ៊ុនសូគីមិចគីឡូម៉ែត្រលេខ៦។
៦.ស្ពានអាកាស និងផ្លូវក្រោមដីចោមចៅ
នៅថ្ងៃទី២៩ ខែមិថុនា ឆ្នាំ២០១៨ កន្លងទៅស្ពានអាកាស និងផ្លូវក្រោមដីចោមចៅ បានចាប់ផ្ដើមបើកការដ្ឋានសាងសង់ហើយ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ គម្រោងមានតម្លៃប្រមាណ២២លានដុល្លារនេះ នឹងប្រើប្រាស់រយៈពេលសាងសង់ចំនួន ៣០ខែ ។
៧.ផ្លូវក្រវាត់ក្រុងទី៣
ផ្លូវក្រវាត់ក្រុងទី៣ ប្រវែងជិត៥៣គីឡូម៉ែត្រ ដែលឆ្លងកាត់ផ្លូវជាតិលេខ៤ មកផ្លូវជាតិលេខ៣ ផ្លូវជាតិលេខ២ និងបញ្ចប់នៅផ្លូវជាតិលេខ១ ក្នុងភូមិសាស្រ្តរាជធានីភ្នំពេញ និងខេត្តកណ្តាល ត្រូវបានបើកការដ្ឋានសាងសង់ហើយ នាព្រឹកថ្ងៃទី១៤ ខែមករា ឆ្នាំ២០១៩។
ផ្លូវនេះ ត្រូវចំណាយការសាងសង់ប្រមាណ ២៧៣លានដុល្លារ ដែលជាហិរញ្ញប្បទានសម្បទានពីរដ្ឋាភិបាលចិន និងថវិកាបដិភាគរបស់រាជរដ្ឋាភិបាលកម្ពុជា។
៨. ស្ពានបេតុងឆ្លងកាត់កោះអន្លង់ចិន
សម្តេចនាយករដ្ឋមន្រ្តី ហ៊ុន សែន បានប្រកាសថា កម្ពុជានឹងមានស្ពានបេតុងដ៏ធំជាងគេ ដែលមានទំហំទទឹងដល់ ២៥ម៉ែត្រ ឆ្លងកាត់ទន្លេបាសាក់ នៅកោះអន្លង់ចិន ក្នុងខេត្តកណ្តាល។ សម្តេចលើកឡើងថា មុខរបររត់ទូកដ នៅតំបន់នេះនឹងត្រូវបញ្ចប់នៅឆ្នាំ២០២១។
ស្ពានឆ្លងកាត់កោះអន្លង់ចិននេះ គឺជាផ្នែកមួយនៃគម្រោងសាងសង់ផ្លូវក្រវាត់ក្រុងទី៣ ដែលមានប្រវែងជិត ៥៣គីឡូម៉ែត្រ និងទទឹងផ្លូវដល់ ២៥ ទៅ ២៧ម៉ែត្រ។ ស្ពានដែលឆ្លងកាត់ទន្លេបាសាក់នេះមានចំនួនពីរ គឺមួយតភ្ជាប់ពីឃុំសិត្បូត៍ ទៅកាន់កោះអន្លង់ចិនដែលមានប្រវែង៣៦៦ម៉ែត្រ និងមួយទៀតតភ្ជាប់ពីកោះអន្លង់ចិន ទៅកាន់ឃុំឈើទាល ស្រុកកៀនស្វាយ មានប្រវែង៦៣០ម៉ែត្រ។
៩. ស្ពានអាកាស៤បន្ថែមទៀតនៅតាមផ្លូវជាតិទាំង៤
ក្នុងពិធីបើកការដ្ឋានសាងសង់ផ្លូវក្រវ៉ាត់ក្រុងទី៣ កាលពីថ្ងៃទី១៤ ខែមករា ឆ្នាំ២០១៩ សម្ដេចអគ្គមហាសេនា បតី តេជោ ហ៊ុន សែន បានប្រកាសថា នឹងសាងសង់ស្ពានអាកាស៤ខ្សែបន្ថែមទៀតនៅប្រទេសកម្ពុជា។ ដោយស្ពានអាកាសទាំង៤ខ្សែនោះ គ្រោងសាងសង់នៅតាមផ្លូវជាតិលេខ២,៣,៤ និង២១ ដើម្បីសម្រួលចរាចរណ៍ឲ្យមានលក្ខណៈកាន់តែល្អប្រសើរឡើង។
ក្រៅពីគម្រោងធំខាងលើរាជរដ្ឋាភិបាលកម្ពុជា នៅមានគម្រោងជាច្រើនទៀតដូចជាស្ពានឆ្លងទន្លេ ផ្លូវក្រោមទឹកជាដើម៕ប្រភពSabay
