ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃទី៦ ខែកញ្ញា ឆ្នាំ២០១៩នេះ បានបង្ហោះសារមួយនៅបណ្តាញសង្គមហ្វេសប៊ុកផ្ទាល់របស់សម្តេច ដោយបានបញ្ជាក់ថា «ខ្ញុំនិងភរិយាទើបបានជួបយុវជនហុង ភារិន និងបងប្រុសរបស់គាត់ឈ្មោះហុង ភារុននៅមុននេះបន្តិចនៅគេហដ្ឋានរបស់ខ្ញុំ»។
នៅក្នុងសាររបស់សម្តេចបានបញ្ជាក់បន្ថែមទៀតថា «គោលបំណងនៃការជួបរបស់ខ្ញុំ គឺចង់ស្វែងយល់ នូវបំណងនិងគោលដៅដែលហុង ភារិនចង់ទៅដើម្បីងាយស្រួល ដល់ការជួយរបស់យើងឱ្យ ស្រប ជាមួយបំណងដែលភារិនចង់ទៅនិងចង់បាន»។
សាររបស់សម្តេចតេជោបានបន្ថែមថា ៖ ខ្ញុំក៏បានជួយដល់ហុង ភារុនដែលរៀនចប់បរិញ្ញាបត្រនិង កំពុងធ្វើកា រនៅក្រសួងសេដ្ឋកិច្ចនិងហិរញ្ញវត្ថុផ្នែកពន្ធដារឱ្យបន្តរៀនយកបរិញ្ញាបត្រជាន់ខ្ពស់តទៅទៀត។ជូនពរកូនប្រុសទាំងពីរជួបតែសេចក្តីសុខនិងសម្រេចនូវបំណងប្រាថ្នាដែលកូនចង់បាន។
សូមជម្រាបថា៖ និសិ្សតឆ្នើម ហុង ភារិន នាពេលថ្មីៗនេះ បានបង្ហាញអំពីសមត្ថភាព និងទេពកោសល្យនៃការចងចាំរបស់ខ្លួននៅក្នុងកម្មវិធីបញ្ចេញសមត្ថភាពរបស់ទូរទស្សន៍ថៃ Super 100 ដោយបានទទួលកោតសរសើរ និងគាំទ្រយ៉ាងខ្លាំងពីគណៈកម្មការ រួមទាំងមហាជនជាច្រើន ទាំងក្នុងប្រទេស និងក្រៅប្រទេស ហើយយុវជន ហុង ភារិន ត្រូវបានមហាជនទូទៅដាក់ឈ្មោះជាអច្ឆរិយកម្ពុជា ភារិន ទៀតផង។
និស្សិតឆ្នើមយុវជន ហុង ភារិន គឺជាកូនទី២ ក្នុងចំណោមបងប្អូនប្រុស២នាក់ មានអាយុ២៣ឆ្នាំ មានទីកន្លែងកំណើតនៅភូមិថ្នល់បែកលិច ឃុំស្វាយទាប ស្រុកចំការលើ ខេត្តកំពង់ចាម។ និស្សិតឆ្នើមយុវជន ហុង ភារិន ជាកូនគ្រួសារកសិករដែលមានជីវភាពលំបាក ដោយសារឪពុកម្តាយ បានលែងលះគ្នា ភារិន បានខិតខំតស៊ូប្រឹងប្រែងរៀនសូត្ររហូតទទួលបានអាហារូបករណ៍ព្រះរាជទានថ្នាក់បរិញ្ញាបត្រ ប្រចាំសាកលវិទ្យាល័យរ៉ាឆាផាត់ឆៃយ៉ាភូមិ ឯកទេសអភិវឌ្ឍន៍ជនបទ។ ក្តីសុបិន្តរបស់និស្សិតឆ្នើមថ្នាក់បរិញ្ញាបត្រឆ្នាំទី៤រូបនេះ គឺចង់យកចំណេះដឹងដែលខ្លួនបានខិតខំរៀនសូត្រមកអភិវឌ្ឍប្រទេសជាតិ។
សូមបញ្ជាក់ជូនថា ៖ កាលពីថ្ងៃទី២ ខែកញ្ញា ឆ្នាំ ២០១៩ យុវជន ហុង ភារិន បានមកដល់ប្រទេសកម្ពុជា ដោយមានការទទួលស្វាគមន៍យ៉ាងកក់ក្តៅពីសំណាក់ប្រជាពលរដ្ឋខ្មែរ និងក្រុមយុវជនផងដែរ ហើយមិន ត្រឹមតែប៉ុណ្ណោះទេ ក៏ឃើញវត្តមានសារព័ត៌មានធំៗក្នុងប្រទេសកម្ពុជា បានចុះទៅសម្ភាសន៍ ផ្ទាល់ជាមួយ ភារិន ថែមទៀតផង៕