ប្រធានាធិបតីអាមេរិច លោកដូណាល់ ត្រាំ បាននិយាយថា សហរដ្ឋអាមេរិចនឹងផ្អាកការធ្វើដំណើរទាំងអស់ ពីតំបន់អឺរ៉ុបចូលក្នុងទឹកដីរបស់ខ្លួន រយៈពេល ៣០ថ្ងៃ ដែលវាគឺជាវិធានការដើម្បីទប់ស្កាត់ ការរីករាលដាលនៃវីរុសកូរ៉ូណា។
ប្រធានលោក ត្រាំថ្លែងថា “ដើម្បីទប់ស្កាត់ការឆ្លងថ្មីចូលក្នុងប្រទេស ពួកយើងនឹងធ្វើការផ្អាករាល់ការធ្វើដំណើរទាំងអស់ ពីអឺរ៉ុបចូលមកអាមេរិច រយៈពេល ៣០ថ្ងៃ។ វិធានការថ្មីនេះ នឹងចូលជាធរមាននៅថ្ងៃសុក្រកណ្តាលអធ្រាត្រ”។
លោកនិយាយថា អឺរ៉ុបមានករណីឆ្លងច្រើន ពីព្រោះរដ្ឋាភិបាលបរាជ័យ ក្នុងការបិទការធ្វើដំណើរពីប្រទេសចិន ដែលជាកន្លែងផ្ទុះនៃវីរុស។
“សហភាពអឺរ៉ុបបរាជ័យ ក្នុងការចាត់វិធានទុកជាមុន និងរឹតត្បិតការធ្វើដំណើរពីចិន និងតំបន់គ្រោះថ្នាក់ផ្សេងទៀត។ ជាលទ្ធផល ករណីឆ្លងជាច្រើន នៅក្នុងសហរដ្ឋអាមេរិច គឺបង្កឡើងដោយអ្នកធ្វើដំណើរពីអឺរ៉ុប”។
លោកបន្ថែមថា ការផ្អាកនោះក៏នឹងត្រូវអនុវត្តទៅលើការដឹកជញ្ជូនទំនិញ និងពាណិជ្ជកម្មមួយចំនួន ខណៈរឿងផ្សេងៗទៀត ត្រូវមានការអនុម័តសិន។
រហូតមកដល់ពេលនេះ អាមេរិច មានអ្នកឆ្លងវីរុសកូរ៉ូណា ឬ COVID-19 ចំនួន ១.៣១១នាក់ និងអ្នកស្លាប់ ៣៨នាក់៕
ប្រភព៖ Channelnewsasia