ភ្នំពេញ៖ ស្ថានទូតចិនប្រចាំកម្ពុជាប្រកាសថា ក្រុមស្រាវជ្រាវវិទ្យាសាស្ត្រដែលដឹកនាំដោយលោកស្រី Chen Wei អ្នកជំនាញផ្នែកកិច្ចការស្រាវជ្រាវវេជ្ជសាស្ត្រយោធា នៃវិទ្យាស្ថានវិទ្យាសាស្ត្រយោធា ប្រទេសចិន បានស្រាវជ្រាវរកឃើញវ៉ាក់សាំងនៃជំងឺកូរ៉ូណា (កូវីដ១៩) យ៉ាងជោគជ័យ។
ស្ថានទូតចិនប្រចាំកម្ពុជា (Chinese Embassy in Cambodia) នៅថ្ងៃទី១៨ ខែមីនា ឆ្នាំ២០២០នេះ បានចេញប្រកាសព័ត៌មាន លើផេកហ្វេសប៊ុកផ្លូវការថា “ក្រុមស្រាវជ្រាវវិទ្យាសាស្ត្រ ដែលដឹកនាំដោយលោកស្រី Chen Wei អ្នកជំនាញផ្នែកកិច្ចការស្រាវជ្រាវវេជ្ជសាស្ត្រយោធា នៃវិទ្យាស្ថានវិទ្យាសាស្ត្រយោធា ប្រទេសចិន បានស្រាវជ្រាវ រកឃើញវ៉ាក់សាំងនៃជំងឺ COVID-19 យ៉ាងជោគជ័យ។ វ៉ាក់សាំងប្រភេទនេះ ទទួលបានការអនុញ្ញាត ក្នុងដំណើរការពិសោធន៍ព្យាបាលជំងឺ។ តាមស្តង់កំណត់នៃអន្តរជាតិ និងតាមបទបញ្ញត្តិក្នុងប្រទេសចិន វ៉ាក់សាំងនេះ ត្រូវបានចាត់ជាកិច្ចការរៀបចំបឋម ដែលប្រកបដោយសុវត្ថិភាព ប្រសិទ្ធភាព គុណភាពដែលអាចគ្រប់គ្រងបាន និង ការផលិតក្នុងទ្រង់ទ្រាយធំ”។
លោកវិល្លាម ប្រធានគណបក្សខ្មែរក្រោក បានប្រកាសព័ត៌មានផ្លូវការនៅលើផេកហ្វេសប៊ុក William Guang នៅថ្ងៃទី១៨ខែមីនានេះថា “អបអរសាទរចំពោះចំពោះសាធារណរដ្ឋប្រជាមានិតចិន ដែលបានការរកឃើញ វ៉ាក់សាំងនៃជំងឺCovid19 ដោយជោគជ័យ និងត្រៀមផលិតក្នុងទ្រង់ទ្រាយធំ នេះបើយោងតាមការប្រកាសរបស់ស្ថានទូតចិននៅកម្ពុជា ដូចនេះបញ្ហា Covid19 ដែលកំពុងបង្ករការភ័យខ្លាចដល់ពលរដ្ឋកម្ពុជា នឹងត្រូវបានកាត់បន្ថយហើយ ។ ហើយបន្ទាប់ពីវ៉ាក់សាំងនោះ បានផលិតរួច ខ្ញុំជឿជាក់ថាមិត្តចិន នឹងបញ្ជូនវ៉ាក់សាំងនោះ ជាជំនួយដល់កម្ពុជាជាក់ជាមិនខាន។ ដូចនេះគ្មានអ្វីដែលត្រូវភ័យខ្លាចទៀតទេ អ្វីដែលគួរភ័យខ្លាចគឺ បញ្ហា សេដ្ឋកិច្ចប្រាក់ចំណូលរបស់អាជីវករ បុគ្គលិក កម្មករ ទៅវិញទេ ដែលគួររួមគ្នាដោះស្រាយ “៕
