ក្រុមសាំម៉ូរ៉ៃជប៉ុនបានបើកឆាកការប្រកួតនៅក្នុងពូល H របស់ពួកគេនាព្រឹត្តិការណ៍នៃការប្រកួតពានរង្វាន់បាល់ទាត់ពិភពលោកឆ្នាំ ២០១៨ ជាមួយនឹងជ័យជម្នះទៅលើក្រុមជម្រើសជាតិកូឡុំប៊ីជាមួយនឹងលទ្ធផល ២-១ ។ កូឡុំប៊ីបានរបូតគ្រាប់បាល់មួយគ្រាប់ដែលជាបាល់ពិន័យ ១១ ម៉ែត្រ និងត្រូវបានបាត់បង់សមាជិកមួយរូបដោយការពិន័យកាតក្រហម ក្រោយចាប់ផ្ដើមការប្រកួតមិនទាន់បាន ៣ នាទីស្រួលបួល។ ជំនួបរវាងកូឡុំប៊ី និងជប៉ុននេះដែរគឺជាការប្រកួតដែលកាតក្រហមបានបង្ហាញខ្លួនដំបូងគេនៅក្នុងការប្រកួតពានរង្វាន់ World Cup ឆ្នាំ ២០១៨ នេះ ហើយក៏ជាកាតក្រហមដែលត្រូវបានពិន័យលឿនបំផុតទី ២ ក្នុងប្រវត្តិសាស្ដ្រផងដែរ គឺត្រឹមតែរយៈពេល ២ នាទី និង ៥៦ វិនាទីប៉ុណ្ណោះ។ ខ្សែបម្រើ Shinji Kagawa បានរ៉ាប់រងការស៊ុតបាល់ពិន័យ ១១ ម៉ែត្រដែលស៊ុតបានសម្រេចគ្រាប់បើកឆាកឲ្យជប៉ុន មុនពេលការស៊ុតតាមបានស្មើមកវិញពីសំណាក់ខ្សែបម្រើ Juan Quintero របស់កូឡុំប៊ី ប៉ុន្តែជាអកុសល្យកូឡុំប៊ីដែលត្រូវបន្តលេងទាំងមានកីឡាករតែ ១០ រូបនៅលើទីលាននោះត្រូវបានទទួលបរាជ័យ បន្ទាប់ពីការស៊ុតបន្ថែមមួយគ្រាប់ទៀតឲ្យជប៉ុនដោយខ្សែប្រយុទ្ធ Yuya Osako ដែលជាគ្រាប់បាល់ជ័យជម្នះ។
ប្រែសម្រួល ៖ ភក្ដី