ក្លិប Atletico Madrid បានឈានដល់កិច្ចព្រមព្រៀងបឋមក្នុងការចុះហត្ថលេខាទិញខ្សែបម្រើស្លាប Thomas Lemar របស់ក្រុម Monaco ខណៈដែល Lemar ពេលនេះកំពុងតែត្រៀមខ្លួនសម្រាប់ការប្រកួតពានរង្វាន់បាល់ទាត់ពិភពលោកនៅប្រទេសរុស្ស៊ីជាមួយក្រុមជម្រើសជាតិបារាំង។ ក្រុមកាំភ្លើងធំ Arsenal បានបរាជ័យក្នុងការតាមទិញកីឡាករបារាំងវ័យ ២២ ឆ្នាំរូបនេះកាលពីរដូវកាលដោះដូរកីឡាកររដូវក្ដៅឆ្នាំទៅ និងត្រូវបានក្រុមហង្សក្រហម Liverpool ចាប់អារម្មណ៍ចង់ទិញយកក្នុងតម្លៃ ៦០ លានផោន ប៉ុន្តែត្រូវបរាជ័យដូចគ្នា។
Lemar ដែលបានចំណាយពេល ៣ រដូវកាលជាមួយក្លិបបារាំង Monaco រូបនេះស៊ុតបញ្ចូលទីបាន ២២ គ្រាប់ពីការបង្ហាញខ្លួន ១២៣ ប្រកួតឲ្យ Monaco ហើយថែមទាំងជួយឲ្យក្រុមមួយនេះលើកពាន Ligue 1 និងបានឡើងទៅវគ្គពាក់កណ្ដាលផ្ដាច់ព្រ័ត្រពានរង្វាន់ Champions League រដូវកាល ២០១៦/១៧ ថែមទៀតផង។ គាត់បង្ហាញខ្លួនប្រកួតដំបូងឲ្យជម្រើសជាតិបារាំងកាលពីឆ្នាំ ២០១៦ និងស៊ុតបញ្ចូលទីបាន ៣ គ្រាប់ដែលបានពីការបង្ហាញខ្លួន ១២ ប្រកួតឲ្យជម្រើសជាតិរបស់គាត់។
“ក្រុម Atletico de Madrid និង AS Monaco បានឈានដល់កិច្ចព្រមព្រៀងជាបឋមលើការផ្ទេរកីឡាករ Thomas Lemar មកកាន់ក្លិបរបស់យើង។ ក្នុងរយៈពេលប៉ុន្មានថ្ងៃខាងមុខនេះក្លិបទាំងពីរនឹងធ្វើការបិទទ្វារកិច្ចព្រមព្រៀងសម្រាប់ការផ្ទេរជាស្ថាពរ។” ក្រុមនៃលីកកំពូលរបស់អេស្ប៉ាញ, At Madrid បានសរសេរនៅលើគេហទំព័រផ្លូវការរបស់ពួកគេ។
ប្រែសម្រួល ៖ ភក្ដី
