តារាបាល់ទាត់ទើបនឹងរះ Mohamed Salah របស់ក្រុមហង្សក្រហម Liverpool បាននិយាយថាការដើរចេញពីទីលានប្រកួតវគ្គផ្ដាច់ព្រ័ត្រនៃពានរង្វាន់ Champions League ដោយសាររបួសស្មាគឺជាព្រឹត្តិការណ៍ដ៏អាក្រក់បំផុតមួយក្នុងអាជីពរបស់ខ្លួន ខណៈដែលគាត់ប្រឈមនឹងការមិនបានបង្ហាញខ្លួននៅក្នុងព្រឹត្តិការណ៍ប្រកួតពានរង្វាន់បាល់ទាត់ពិភពលោកឆ្នាំ ២០១៨ នេះជាមួយជម្រើសជាតិអេហ្ស៊ីព។ Salah បានបោះបង់ចោលការប្រកួតពាក់កណ្ដាលទី និងដើរចេញពីទីលានប្រកួតទាំងទឹកភ្នែក បន្ទាប់ពីការដណ្ដើមបាល់គ្នាជាមួយខ្សែការពារ Sergio Ramos ដែលធ្វើឲ្យគាត់មានរបួសស្មា អំឡុងពេលក្រុមរបស់ខ្លួនប្រកួតជាមួយក្រុមយក្សរបស់អេស្ប៉ាញ Real Madrid កាលពីខែមុនក្នុងជំនួប Champions League ដែលជាលទ្ធផល Real បានលត់ Liverpool ៣-១ លើកពានជាលើកទី ១៣ របស់ពួកគេ។
វាគឺជារបួសដែលបង្កឲ្យមានការព្រួយបារម្ភដល់ក្រុមជម្រើសជាតិអេហ្ស៊ីព ក៏ដូចជាអ្នកគាំទ្ររបស់ពួកគេ មុនពេលព្រឹត្តិការណ៍ World Cup នៅប្រទេសរុស្ស៊ីចូលមកដល់ បើទោះបីជាអ្នកចាត់ការរបស់ក្រុមជម្រើសជាតិអេហ្ស៊ីពបានអះអាងពីក្ដីសង្ឃឹមថា Salah នឹងជាទាន់ពេល និងអាចចូលទីលានប្រកួតបាន ខណៈដែល Salah ផ្ទាល់បានរៀបរាប់ថាការចាកចេញពីទីលានប្រកួតវគ្គផ្ដាច់ព្រ័ត្រនាពេលនោះគឺជារឿងដ៏អាក្រក់បំផុតមួយសម្រាប់គាត់។ “ការចាកចេញពីទីលានប្រកួតនៃវគ្គផ្ដាច់ព្រ័ត្រគឺជាព្រឹត្តិការណ៍ដ៏អាក្រក់មួយក្នុងអាជីពរបស់ខ្ញុំ។” គាត់បានថ្លែងប្រាប់កាសែត Marca ។ “ហើយខ្ញុំបានចាប់ផ្ដើមគិតថាខ្ញុំនឹងមិនអាចបង្ហាញខ្លួននៅ World Cup បានទេមើលទៅ…”
អេហ្ស៊ីពនឹងបើកការប្រកួត World Cup សម្រាប់ពូល A របស់ពួកគេនៅថ្ងៃទី ១៥ មិថុនាខាងមុខដោយពួកគេត្រូវប៉ះគ្នាជាមួយក្រុមជម្រើសជាតិអ៊ុយរ៉ូហ្គាយ។ ហើយអេហ្ស៊ីពក៏នឹងត្រូវប្រកួតជាមួយក្រុមម្ចាស់ផ្ទះរុស្ស៊ី និងអារ៉ាប៊ីសាអូឌីតផងដែរដែលនៅក្នុងពូល A ជាមួយគ្នា ខណៈដែលពួកគេត្រៀមបញ្ចប់ការរង់ចាំរយៈពេល ២៧ ឆ្នាំរបស់ពួកគេក្នុងការឡើងមកកាន់ការប្រកួតពាន World Cup ។ “សម្រាប់ពួកយើង ការបានឡើងមកកាន់ World Cup គឺវាស្ទើរតែមិនខុសគ្នាប៉ុន្មានទេពីអេស្ប៉ាញនៅពេលពួកគេលើកពាន។” Salah បន្ថែម។
ប្រែសម្រួល ៖ ភក្ដី