អភិបាលនៃគណៈអភិបាលខេត្តកំពង់ស្ពឺ ឯកឧត្តម វ៉ី សំណាង បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៩ ខែឧសភា ឆ្នាំ២១០៩ នេះថា គម្រោងនៃការវិនិយោគលើមជ្ឈមណ្ឌលកម្សាន្តលំដាប់ពិភពលោកមួយនេះ មានឈ្មោះ ចូ ហ្គ្រេន ត្រូវបានធ្វើឡើង ក្រោមកិច្ចសហការរវាងបណ្តាប្រទេសចំនួន៣ រួមមាន ប្រទេស ស្វីស ហុងកុង និងប្រទេសសិង្ហបុរី។
ឯកឧត្តមបន្តថា គម្រោងមេរបស់មជ្ឈមណ្ឌលកម្សាន្តមួយនេះ គឺមានទំហំទឹកប្រាក់រហូតដល់ប្រមាណ ៥០០លានដុល្លារ ប៉ុន្តែនៅក្នុងតំណាក់កាលដំបូងក្រុមហ៊ុនទាំងនេះ នឹងចំណាយទឹកប្រាក់ចំនួន២០០លានដុល្លារ នៅលើផ្ទៃដីទំហំជាង១០០ហិកតា ស្ថិតនៅក្នុងស្រុកភ្នំស្រួច និងស្រុកសំរោងទង ដែលនឹងបញ្ចប់គម្រោងសាងសង់ទាំងស្រុងត្រឹមរយ៥ឆ្នាំ ដើម្បីដំណើរការឱ្យទាន់គម្រោងសាងសង់ ផ្លូវល្បឿនលឿនភ្នំពេញ-ព្រះសីហនុ”។
ឯកឧត្តមបន្ថែមទៀតថា មជ្ឈមណ្ឌលកម្សាន្តដ៏ធំលើកដំបូងប្រចាំកម្ពុជាមួយនេះត្រូវបានធ្វើការបែងចែកចេញជាច្រើនផ្នែក ដូចជា តំបន់ក្មេងលេងទឹក តំបន់សម្រា់មនុស្សពេញវ័យកម្សាន្តជាមួយឧបករណ៍ទំនើបៗ តំបន់សម្រាប់មនុស្សចាស់លំហែរកាយតាមលក្ខណៈធម្មជាតិ និងតំបន់ជិះកងហាត់ប្រាណដែលមានទំហំរហូតដល់៤គីឡូម៉ែត្រ រួមជាមួយការធ្វើជាកសិដ្ឋានបន្លែចម្រុះ និងស្រូវសម្រាប់បង្ហាញជូនដល់បណ្តាភ្ញៀវទេសចរអន្តរជាតិ។ ក្រៅពីនេះ នៅមានកាសាងសង់ជាផ្ទះសំណាក់លំហែរកាយ កម្រិតផ្កាយ៥សម្រាប់ទទួលស្វាគមន៍បណ្តាភ្ញៀវទេសចរចម្រុះជាតិសាសន៍ ដែលមកពីគ្រប់ប្រទេសនៅលើពិភពលោក។
ជាមួយនឹងគម្រោងដ៏មហិមានៃមជ្ឈមណ្ឌលកម្សាន្តមួយនេះ លោកបានសម្ដែងនូវក្ដីសាទរ ដែលអាចជួយលើកស្ទួយវិស័យទេសចរណ៍នៅកម្ពុជា និងបង្កើនចំណូលសេដ្ឋកិច្ចជាតិ ជួយកាត់បន្ថយភាពក្រីក្រ តាមរយៈការផ្តល់ការងារជូនដល់ប្រជាពលរដ្ឋរាប់ពាន់កន្លែង។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍តាមទូរស័ព្ទថា វិស័យទេសចរណ៍នៅកម្ពុជា គឺនៅមានចំណុចខ្វះខាតច្រើន ដែលត្រូវបំពេញបើប្រៀបធៀប ជាមួយបណ្តាប្រទេសនានានៅក្នុងតំបន់អាស៊ី ជាក់ស្ដែងដូចជានៅទីក្រុងបាងកក ប្រទេសថៃ គឺគេមានអ្វីៗជាច្រើន ដោយឡែកនៅក្រុងភ្នំពេញវិញតំបន់កម្សាន្តដែលគួរជាទីទាក់ទាញនៅមានចំនួនតិចតួចនៅឡើយ។
លោកបន្តទៀតថា “នៅពេលមានមជ្ឈមណ្ឌលកម្សាន្តលំដាប់ពិភពលោក ដូចការលើកឡើងខាងលើនេះមែន នោះវាជារឿងដែលល្អប្រសើរបំផុត ព្រោះវានឹងជួយបង្កើនភាពទាក់ទាញលើវិស័យទេសចរណ៍នៅកម្ពុជា ដូចជាបណ្តាប្រទេសនានាក្នុងតំបន់ផងដែរ”។
លោកជំទាវឧកញ៉ាឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ថា វាជាសញ្ញាល្អមែនទែនសំរាប់ខេត្តកំពង់ស្ពឺ និងប្រទេសជាតិទាំងមូល ព្រោះគម្រោងវិនិយោគដែលមានទុនធំបែបនេះ ពិបាករកណាស់។លោកស្រីបន្តថា គំរោងវិនិយោគវិស័យទេសចរណ៍ចូលទៅកាន់ខេត្តកំពង់ស្ពឺ ក៏ជាខេត្តសម្បូរធនធានធម្មជាតិ ដែលមានសក្តានុពលសំរាប់វិស័យទេសចរណ៍ផងដែរ។
លោកជំទាវបន្តថា “យើងត្រូវការអ្នកវិនិយោគបែបនេះ ព្រោះគំរោងធំបែបនេះអ្នកវិនិយោគនឹងខិតខំផ្សព្វផ្សាយទៅកាន់ពិភពលោក ដើម្បីទាក់ទាញភ្ញៀវទេសចរណ៍មកកាន់កម្ពុជា ដើម្បីចូលទៅទស្សនាគំរោងរបស់ពួកគេផងដែរ”៕ប្រភពpropertyarea
