ការផលិតស្មាតហ្វូនដែលមានអេក្រង់កោង អាចបត់បានកំពុងក្លាយជាផ្ទាំងស៊ីបធំ មួយ ដែលក្រុមហ៊ុនទូរសព្ទជាច្រើនមានគម្រោងចង់បាញ់ទម្លាក់ ចូលទៅកាន់ទីផ្សារខណៈមានក្រុម ហ៊ុន ខ្លះ ក៏បានប្រកាសចេញ រួចរាល់ហើយដែរ។ ក្នុងនោះ សម្រាប់ក្រុមហ៊ុនផ្លែប៉ោមឆែប យើងក៏ធ្លាប់ បានឃើញ រូបភាពប៉ាតង់ ដែលបានលេចធ្លាយ បង្ហាញពីគម្រូលើស្មាតហ្វូន មានអេក្រង់កោង អាចបត់បាន របស់ពួកគេ មួយចំនួនដែរ កាលពីពេលកន្លងទៅ ។
ប៉ុន្តែអ្វីដែលយើងចាប់អារម្មណ៍ សម្រាប់ពេលនេះ គឺថាការិយាល័យពាណិជ្ជកម្ម និងប៉ាតង់របស់សហរដ្ឋ អាមេរិច បានធ្វើការបង្ហាញរូបភាពប៉ាតង់ថ្មីមួយ ជាមួយបន្ទះអេក្រង់ ដែលអាចបត់បាន។ យោងតាមរូបភាព យើងបានឃើញថា បន្ទះអេក្រង់គម្រូនេះ មិនមែនបត់តែមួយគម្លាក់ទេ គឺបត់ 2 គន្លាក់តែម្តងដែលវាកាន់តែ ប្លែក មួយកម្រិតទៀត ខុសពីលើកមុនៗ។ មិនទាន់មានការបញ្ជាក់ និងបង្ហើបអោយបានដឹងទេថា បន្ទះ អេក្រង់បត់ច្រើនតង់នេះ នឹងកើតនៅលើ iPhone ឬ iPad ជំនាន់ថ្មី ឬអាចជាឧបករណ៍អេឡិចត្រូនិច ណាមួយ ឡើយ។ មានអតិជនខ្លះ ក៏បានលើកឡើងថា វាអាចជា iDevices កូនកាត់ iPhone + iPad សម្រាប់ពេលចេញ រូបរាងពិត ដូចទៅនឹងគម្រូបន្ទះអេក្រង់កោង អាចបត់ច្រើនគន្លាក់ ប្លែកខុសគេ បែបនេះ។
សរុបមក យើងនៅមិនទាន់ហ៊ានអះអាង អោយជាក់លាក់ទេថា ប៉ាតង់ថ្មី លើបន្ទះអេក្រង់ ដែលអាចបត់បាននេះ នឹងដូចជាមួយ រូបភាពគម្រូខាងលើ ឬអត់ឡើយ។ គ្រប់យ៉ាង គឺយើងទាំងអស់គ្នា មានតែរង់ចាំមើលបន្តទៀតថា ចុងក្រោយនៃអនាគត ឧបករណ៍មានបន្ទះអេក្រង់កោង បត់បានច្រើនគន្លាក់ របស់ម៉ាកសញ្ញាផ្លែប៉ោមឆែបនេះ នឹងទៅជាយ៉ាងណា ៕
ប្រែលសំរួលដោយ៖ សុខជា