ដីធ្លីនៅក្នុងតំបន់ភ្នំប្រសិទ្ធ និងភ្នំរាប កំពុងមានការចាប់អារម្មណជាខ្លាំង ដែលមួយភាគធំស្ថិតនៅក្នុង ស្រុកពញាឮ ខេត្តកណ្តាល ហើយមួយប៉ែកទៀត ត្រូវបានកាត់ចូលមកចំណុះរាជធានីភ្នំពេញស្ថិតនៅក្នុងខណ្ឌព្រែកព្នៅ បាននឹងកំពុងចាប់ផ្តើមមានភាពទាក់ទាញការអភិវឌ្ឍជាបណ្ដើរៗហើយ បន្ទាប់ពីរាជរដ្ឋាភិបាលប្រកាសគម្រោងអភិវឌ្ឍនៅតំបន់បឹងតាម៉ោក។
អគ្គនាយកក្រុមហ៊ុនអចលនទ្រព្យចក្រក្រវាល ដីពេជ្រ លោក ប៊ុន សាវសត្ថា បានមានប្រសាសន៍ឲ្យដឹងចុងសប្តាហ៍មុនថា បច្ចុប្បន្ននេះដីនៅតំបន់ភ្នំប្រសិទ្ធចាប់ផ្តើមមានភាពទាក់ទាញជាបណ្ដើរៗហើយ ប៉ុន្តែនៅមិនទាន់ខ្លាំងក្លាដូចជាតំបន់បឹងតាម៉ោក ឬតំបន់ទំបន់កប់ស្រូវនោះទេ។ លោកបានបន្តទៀតថា នៅមិនយូរទៀតនោះទេ វិស័យធ្លីនៅតំបន់ភ្នំបាសិទ្ធ និងតំបន់ជុំវិញនឹងបង្កើនភាពទាក់ទាញ ដែលវាជាការរុញច្រានចេញពីតំបន់ទំនប់កប់ស្រូវ និងតំបន់បឹងតាម៉ោក។
លោកបានបន្តទៀតថា “ពេលនេះក្រៅពីសកម្មភាពនៃការពុះដីឡូតិ៍លក់ ក៏មានអ្នកអភិវឌ្ឍកម្រិតមធ្យមមួយចំនួនតូច ចាប់ផ្តើមធ្វើសកម្មភាពសាងសង់សំណង់លំនៅដ្ឋានកម្រិតមធ្យមចាប់ពី១០-២០ល្វែងជាបណ្តើរៗហើយ ដែលទាំងនេះក៏ជាកត្តាមួយជួយគៀងគរអ្នកអភិវឌ្ឍដទៃទៀត ឱ្យចូលទៅចូលរួមធ្វើការវិនិយោគ និងអភិវឌ្ឍនៅតំបន់នេះបន្ថែមទៀត”។
លោកបានបន្តថា “បច្ចុប្បន្នគម្រោងអភិវឌ្ឍរបស់រដ្ឋបាលរាជធានីភ្នំពេញ បានចាកចេញពីតំបន់កណ្តាលក្រុងមកដល់តំបន់ជាយក្រុងហើយ”។ លោកបន្តទៀតថា “នៅពេលកំណើនមនុស្សកាន់តែច្រើន ទីក្រុងកាន់តែពង្រីកវិសាលភាពរបស់ខ្លួន ជាក់ស្ដែងពេលនេះតំបន់ទំនប់កប់ស្រូវ និងតំបន់បឹងតាម៉ោក កំពុងតែមានភាពទាក់ទាញខ្លាំងពីសំណាក់អ្នកអភិវឌ្ឍ ដែលវានឹងជម្រុញវិសាលភាពមកដល់តំបន់ប្រសិទ្ឋ”។
លោកបន្តទៀតថា “យ៉ាងយូរត្រឹមរយៈពេល៥ឆ្នាំខាងមុខនេះ តំបន់ភ្នំបាសិទ្ធនឹងពោរពេញទៅដោយលំនៅដ្ឋានកម្រិតមធ្យម និងក្រោមធម្យម”៕
