ភ្នំពេញៈ កាន់កាំបិតប៉័ងតោ រត់ទៅឆក់កាបូបម្នាក់ កំពុងអង្គុយញាំអាហារបានសម្រេច រត់គេចធ្លាក់រណ្ដៅក្នុងការដ្ឋានជម្រៅប្រហែល៦ម៉ែត្រ ប្រជាសពលរដ្ឋ ចាប់ប្រគល់ឲ្យសមត្ថកិច្ច ហេតុការណ៍នេះបង្កការភ្ញាក់ផ្អើលឡើងនៅវេលាម៉ោង២៖៣០នាទីរំលងអធ្រាត្រឈានចូលថ្ងៃទី១០ ខែមករា ឆ្នាំ២០១៩ នៅចំណុចហាងផឹកស៊ីមួយកន្លែង ខាងក្រោយស្ថាតទូតអូស្ត្រាលី ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ជនសង្ស័យឈ្មោះ ឌី ហាក់ ភេទប្រុស អាយុ២៤ឆ្នាំ មុខរបរនិងទីកន្លែងស្នាក់នៅមិនពិតប្រាកដ។ ចំណែកនារីរូបស្រស់រងគ្រោះ សុំលាក់អត្តសញ្ញាណ ។
យោងតាមប្រភពពីកន្លែងកើតហេតុបានប្រាប់ឲ្យភ្នាក់ងារ ខេមប៉ុស្តិ៍ ឲ្យដឹងថា មុនពេលកើតហេតុគេឃើញនារីរូបស្រស់ម្នាក់កំពុងតែអង្គុយញាំអីនៅ ក្នុងហាងមួយកន្លែង នៅខាងក្រោយស្ថាតទូតអូស្ត្រាលី ខណៈនោះ ក៏លេចមុខជនសង្ស័យម្នាក់ មិនដឹងដើរថ្មើរជើងមកពីណា ក៏សំដៅទៅនារីរងគ្រោះ រួចធ្វើសកម្មភាពឆក់យកកាបូប ដែលដាក់នៅលើតុបានសម្រេច ហើយជនរងគ្រោះ ក៏បានស្រែកឆោឡោហៅឲ្យគេជួយ ភ្លាមនោះប្រជាពលរដ្ឋនៅទីនោះបាននាំគ្នារត់ដេញតាមជនសង្ស័យ រហូតដល់ក្នុងការដ្ឋានសំណង់មួយកន្លែងធ្វើឲ្យជនសង្ស័យភ័យពេក ក៏រត់ធ្លាក់រណ្ដៅ ដែលមានជម្រៅប្រហែង៦ម៉ែត្រ ទើបប្រជាពលរដ្ឋចាប់បាននិងឆែកឃើញកាំបិតប៉័ងតោមួយ ហើយប្រគល់ឲ្យសមត្ថកិច្ចប៉ុស្ដិ៍ទន្លេបាសាក់។
បច្ចុប្បន្នជនសង្ស័យត្រូវបានឃុំខ្លួនបណ្ដោះអាសន្ននៅប៉ុស្ដិ៍នគរបាលរដ្ឋបាលទន្លេបាសាក់ ដើម្បីកសាងសំណុំរឿងបញ្ជូនទៅអធិការដ្ឋានខណ្ឌចំកាមនចាត់ការតាមនីតិវិធីច្បាប់៕
ប្រភព៖ FB
