រថយន្តដឹកស៊ីម៉ង់ត៍បើកលឿន គេចរថយន្តមួយគ្រឿងទៀតជ្រុលបុកបង្គោលភ្លើងបាក់រលំ បុកចូលផ្ទះប្រជាពលរដ្ឋ

ភ្នំពេញ៖ រថយន្តដឹកស៊ីម៉ង់ត៍បើកលឿន គេចរថយន្តមួយគ្រឿងទៀតជ្រុលបុកបង្គោលភ្លើងបាក់រលំ បុកចូលផ្ទះប្រជាពលរដ្ឋ របួសធ្ងន់២នាក់ គាបជាប់អ្នកបើកបរក្នុងកាប៊ីនរថយន្ត ក្រុមជួយសង្គ្រោះ ប្រើពេលជាច្រើនម៉ោង ទើបគាស់ យកមនុស្សចេញបាន ហេតុការណ៍នេះបានកើតឡើងនៅវេលាម៉ោង៧និង១៥នាទីព្រឹកថ្ងៃទី២៥ ខែវិច្ឆិកា ឆ្នាំ២០១៨ ស្ថិតនៅតាមផ្លូវទំនប់កប់ស្រូវ កែងផ្លូវបេតុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ ។

មុនកើតហេតុ រថយន្តដឹកស៊ីម៉ង់ត៍ខាងលើ ម៉ាកFUSO ពណ៌ស ពាក់ស្លាកលេខភ្នំពេញ 3C-4324 បើកតាមបណ្តោយផ្លូវទំនប់កប់ស្រូវ ល្បឿនលឿនពីត្បូងទៅជើង លុះដល់ចំណុចកើតហេតុ វ៉ាក់អើជាមួយរថយន្តកុងតៃន័រ មួយគ្រឿងផ្សេងទៀត បើកតាមផ្លូវបេតុង ពីកើតទៅលិច ឆ្លងផ្លូវទំនប់កប់ស្រូវ បត់ឆ្ពោះទៅត្បូង ធ្វើឲ្យរថយន្តដឹកស៊ីម៉ង់ត៍ ព្យាយាមគេចទៅស្តាំ កៀរម៉ូតូស្មាស់កំពុងឈប់រង់ចាំឆ្លងផ្លូវ ពាក់ស្លាកលេខ ភ្នំពេញ 1AH-3941 ដួលច្រង៉ាង រងរបួសធ្ងន់ ហើយរថយន្តជ្រុលទៅបុកបង្គោលភ្លើងរដ្ឋ បាក់រលំ ហើយបុកចូលផ្ទះ អ្នកលក់ដូរ រលំមួយចំហៀង សង្កត់បង្គោលភ្លើងលើរថយន្ត លើផ្ទះ គៀបជាប់អ្នកបើកបរក្នុងរថយន្ត ។

ជនរងគ្រោះម្នាក់ជាអ្នកបើកបរ ម៉ូតូ ត្រូវបានរថយន្តគ្លីនិកឯកជនដឹកយកទៅ ចំណែកជនរងគ្រោះ ជាអ្នកបើកបររថយន្ត នៅគៀបជាប់ជើងចេញពុំរួច ត្រូវបានក្រុមសង្គ្រោះរបស់អង្គភាព៧១១ ចេញទៅអន្តរាគមន៍ ពុះ វះ ទាញ យកជនរងគ្រោះចេញពីគំនរបាក់បែក ដើម្បីដឹកបញ្ជូនទៅ សង្គ្រោះនៅមន្ទីរពេទ្យព្រះកុសុម: ក្នុងស្ថានភាពរបួសជើង និងបែកក្បាលធ្ងន់ ៕