ខេត្តបាត់ដំបង ៖ បើតាមគណីហ្វេសប៊ុកផេកឈ្មោះCambo Agriculture tips បានសរសេររៀបរាប់ថាកន្ទក់ជ្រូក១គីឡូតម្លៃ៨០០រៀលរីឯស្រូវល្អ១គីឡូឈ្មួញឲ្យថ្លៃតែ៦៥០រៀល ពោលគឺថោកជាងកន្ទក់ទៅទៀតនេះជាសារពីប្រជាកសិករ ។ បើសិនរូបខ្ញុំជាមន្ត្រីក្រសួងកសិកម្មដែលចូលចិត្តស៊ីតែរបស់ថ្លៃៗខ្ញុំនឹងស៊ីកន្ទក់ជ្រូកជាជាងស៊ីបាយកើតពីស្រូវថោកៗ ។
ពេលគ្មានភ្លៀងស្រូវស្កកប្រជាជនស្រែកសុំទឹកធ្វើស្រែកាកបាតក្រហមចុះចែកទឹកអោយផឹក ។
ពេលទឹកឡើងខ្លាំងលិចស្រូវប្រជាជនស្រែកអោយជួយបូមទឹកចេញយកដីធ្វើស្រែរដ្ឋជំលៀសប្រជាជនចេញពីដីស្រែទុកឱកាសអោយកាកបាតក្រហមចុះចែកអង្ករ ។ ដល់ពេលស្រូវទទួលបានផលល្អប្រសើរនៅតែប្រជាជនស្រែកសុំទីផ្សារចង់បានតម្លៃត្រឹមសមរម្យ ។
សង្កេតមើលប្រជាពលរដ្ឋកសិករទោះបីកសិផលបានទទួលនូវលទ្ធផលបែបណាក៏ត្រូវសុំជំនួយពីរដ្ឋាភិបាលរហូតតើរដ្ឋាភិបាលកំពុងតែធ្វើអ្វីរាល់ថ្ងៃនឹង ?
គួរជម្រាបថា នៅព្រឹកថ្ងៃទី១១ ធ្នូ ២០១៩ ម្សិលមិញនេះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអញ្ជើញប្រគល់សញ្ញាបត្រជូននិស្សិត CUS ជិត៧ពាន់នាក់នៅមជ្ឈមណ្ឌលសន្និបាត និងពិព័រណ៍កោះពេជ្រសម្តេចតេជោ ហ៊ុន សែន បានអំពាវនាវដល់ប្រជាពលរដ្ឋបង្វែរការធ្វើស្រូវរដូវប្រាំងទៅជាការដាំបន្លែបង្ការជំនួសវិញដើម្បីសន្សំទឹកសម្រាប់ប្រើប្រាស់ ។
ជាមួយគ្នានេះ សម្តេចតេជោ ហ៊ុន សែន បានអំពាវនាវទៅដល់រោងម៉ាស៊ីនកិនស្រូវទាំងអស់កុំទម្លាក់ថ្លៃស្រូវរបស់ប្រជាពលរដ្ឋហើយទទួលការទិញក្នុងតម្លៃសមរម្យ ។
សម្តេចតេជោនាយករដ្ឋមន្ត្រី ស្នើក្រសួងកសិកម្ម និងក្រសួងសេដ្ឋកិច្ចតាមដានលើរឿងនេះ។ ក៏បានស្នើទៅសភាពាណិជ្ជកម្ម ពិនិត្យទៅលើការទិញស្រូវរបស់ប្រជាពលរដ្ឋផងដែរ ។
សូមរម្លឹកថា កាលពីថ្ងៃទី៥ ខែធ្នូ ឆ្នាំ២០១៩ ធនាគារអភិវឌ្ឍន៍ជនបទបានប្រកាសជូនដំណឹងដល់សាធារណជនប្រជាកសិករម្ចាស់រោងម៉ាស៊ីនកិនស្រូវ និងអ្នកប្រមូលទិញស្រូវទាំងអស់ជ្រាបថាសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជាតាមរយៈក្រសួងសេដ្ឋកិច្ច និងហិរញ្ញវត្ថុបានបញ្ចេញថវិកាបន្ថែមចំនួន៥០លានដុល្លារ និងបានប្រែក្លាយ «ធនាគារអភិវឌ្ឍន៍ជនបទ» ទៅជា «ធនាគារអភិវឌ្ឍន៍ជនបទ និងកសិកម្ម» សម្រាប់បម្រើវិស័យកសិកម្មជាពិសេសប្រើប្រាស់សម្រាប់រក្សាស្ថិរភាពថ្លៃ និងប្រមូលទិញស្រូវពីកសិករហើយស្តុកទុកកិនកែច្នៃនិងនាំចេញ។
ប្រភព៖ FB
កែសម្រួលដោយ៖ NCN Daily
