ភ្នំពេញ៖ អាជ្ញាធររាជធានីភ្នំពេញ បានប្រាប់ឱ្យអាជីវករលក់ដូរនៅលើឡៅតឿ ក្រោមឡៅតឿ សំណង់ផ្សារអូរឫស្សី និងជុំវិញបរិវេណទីតាំង ត្រូវផ្ទេរការលក់ដូរជាបណ្តោះអាសន្ន ដើម្បីជួសជុលឡើងវិញ ព្រោះសំណង់មានសភាពបែកប្រេះស្រាំ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ នៅព្រឹកថ្ងៃទី១៧ ខែធ្នូ ២០១៩នេះ បានឱ្យដឹងថា បច្ចុប្បន្នសំណង់អាគារផ្សារអូរប្ញស្សី មានលក្ខណៈរឹងមាំ និងមានគុណភាពប្រើប្រាស់យូរអង្វែង។ ដោយឡែកតែសំណង់ឡៅតឿប៉ុណ្ណោះ ដែលមានសភាពបែកប្រេះស្រាំដោយអន្លើ ប្រសិនបើទុកយូរបន្តទៀត អាចបង្កគ្រោះថ្នាក់ដល់ប្រជាពលរដ្ឋ ជាពិសេសអាជីវករលក់ដូរក្នុងផ្សារ អតិថិជន និងខូចខាតទ្រព្យសម្បត្តិរបស់ប្រជាពលរដ្ឋ។
ដូចនេះ ដើម្បីរក្សាសន្តិសុខ សុវត្ថិភាព និងចៀសវាងរាល់ហានិភ័យដែលកើតមានឡើងជាយថាហេតុ រដ្ឋបាលរាជធានីភ្នំពេញ បានស្នើឱ្យអាជីវករដែលកំពុងលក់ដូរនៅលើឡៅតឿ ក្រោមឡៅតឿ និងជុំវិញបរិវេណទីតាំងនេះទាំងអស់ ផ្ទេរការលក់ដូរជាបណ្តោះអាសន្នក្នុងរយៈពេលខ្លី ទៅទីតាំងថ្មីនៅក្រៅផ្សារតាមកាលបរិច្ឆេទដែលបានគ្រោងទុក ដើម្បីបង្កលក្ខណៈឱ្យក្រុមការងារបច្ចេកទេសសំណង់ ធ្វើការជួសជុលឡើងវិញជាបន្ទាន់ និងឆាប់រួចរាល់ ដើម្បីឱ្យអាជីវករ បានត្រឡប់ចូលមកលក់ដូរនៅកន្លែងដើមវិញ ប្រកបដោយសុវត្ថិភាព និងសោភ័ណភាព៕
