(ភ្នំពេញ) ក្រសួងសេដ្ឋកិច្ច និងហិរញ្ញវត្ថុ បានចុះហត្ថលេខាលើកិច្ចព្រមព្រៀងឥណទានសម្បទានប្រមាណ ២៥៩លានដុល្លារ ជាមួយនឹងរដ្ឋាភិបាលចិន ដើម្បីយកទៅអភិវឌ្ឍន៍ផ្លូវខ្សែក្រវ៉ាត់ក្រុងទី៣ នៅកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច នៅខែកក្កដាថ្មីនេះ ឆ្នាំ២០១៨។
គម្រោងខាងលើនេះ នឹងត្រូវសាងសង់ចាប់ពីផ្លូវជាតិលេខ ៤ ម្តុំអូរដឹម ត្រង់គីឡូម៉ែត្រលេខ ១៤+១០៥ ទៅចំណុចបញ្ចប់ភ្ជាប់នឹងផ្លូវជាតិលេខ១ ត្រង់គីឡូម៉ែត្រលេខ ២៤+៨៤០ ដោយភ្ជាប់ទៅនឹងកំពង់ផែភ្នំពេញថ្មី។ ផ្លូវនេះ នឹងត្រូវឆ្លងកាត់ផ្លូវជាតិលេខ៣ ផ្លូវជាតិលេខ២ និងផ្លូវជាតិលេខ២១ ព្រមទាំងមានផ្លូវខ្នែងប្រវែង ៥,៣៧គីឡូម៉ែត្រផងដែរ។
គួរជម្រាបថា គម្រោងផ្លូវខ្សែក្រវ៉ាត់ក្រុងទី៣នេះ មានប្រវែងសរុបប្រមាណ ៤៧.៦០៨គីឡូម៉ែត្រ និងមានទទឹងសរុប ២៥ម៉ែត្រ ជាប្រភេទផ្លូវ ៤គន្លង (២ទៅ ២មក) ដោយក្នុងមួយគន្លងមានទទឹង ៣,៥០ ម៉ែត្រ និងផ្លូវទោចក្រយានយន្ត ២គន្លង (១ទៅ ១មក) ក្នុងមួយគន្លងមានទទឹង ២,២៥ម៉ែត្រ។
កិច្ចព្រមព្រៀងឥណទានសម្បទានសម្រាប់គម្រោងសាងសង់ផ្លូវក្រវាត់ក្រុងទី៣ ដែលភាគីទាំងពីរទើបបាន ចុះហត្ថលេខានេះ គឺជាផ្លែផ្កាថ្មីស្រឡាងមួយទៀត ដែលកើតចេញពីភាពជាដៃគូយុទ្ធសាស្រ្តគ្រប់ជ្រុងជ្រោយ រវាងព្រះរាជាណាចក្រកម្ពុជា ជាមួយសាធារណរដ្ឋប្រជាមានិតចិន ក្រោមការដឹកនាំប្រកបដោយបញ្ញាញាណ និងគតិបណ្ឌិតរបស់លោកនាយករដ្ឋមន្រ្ដី ហ៊ុន សែន ។
សូមបញ្ជាក់ថា គម្រោងសាងសង់ផ្លូវក្រវ៉ាត់ក្រុងទី៣នេះ ក៏មានការសាងសង់ស្ពានអាកាសកាត់ផ្លូវជាតិលេខ៤ លេខ៣ និងលេខ២១ ជាមួយនឹងការសាងសង់ស្ពានឆ្លងទន្លេបាសាក់ចំនួន១០ នៅស្រុកស្អាង ព្រមទាំងស្រុកកៀនស្វាយ ដែលមានទទឹង២៥m និងក្រាលកៅស៊ូអ៊ុត(ASphaltconcrete) រួមទាំងមានលូ១០១កន្លែង ដែលមាន២ប្រភេទគឺប្រភេទលូមូលចំនួន២៨កន្លែង មុខកាត់ជាមធ្យម១,៦០m ប្រភេទលូជ្រុងចំនួន៧៣កន្លែង មុខកាត់ជាមធ្យម ៣ម៉ែត្រ ៕ប្រភពBusiness
