“បើខ្ញុំនៅបន្តជារដ្ឋមន្ត្រីក្រសួងអប់រំ ខ្ញុំនឹងផ្ដោតសំខាន់លើគម្រោងចំនួន៧”។ ប៉ុន្តែឯកឧត្ដមបានបង្ហើបថា ក្នុងចំណោមគម្រោងទាំងអស់ផ្ដោតសំខាន់ជាងគេគឺ គាំទ្រគ្រូបង្រៀន និងសាលារៀន។ ឯកឧត្ដមថា ដើម្បីឱ្យវិស័យអប់រំខ្លាំង ទាល់តែបន្តគាំទ្រគ្រូបង្រៀន និងពង្រឹងសាលារៀន។ សាលារៀនត្រូវមានឧបករណ៍ និងសម្ភារៈគ្រប់គ្រាន់ និងបរិស្ថានល្អ។
ទាំងនេះ គឺជាការលើកឡើងរបស់ឯកឧត្ដម ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាបានថ្លែងប្រាប់ លោកគ្រូ-អ្នកគ្រូ ក្នុងឱកាសបំពាក់គ្រឿងឥស្សរិយយសការងារ ជូនបុគ្គលិកអប់រំនៃមន្ទីរអប់រំ យុវជន និងកីឡា ខេត្តកំពង់ចាមកាលពីចុងសប្ដាហ៍មុន។
បច្ចុប្បន្ននេះសង្គមបានទទួលស្គាល់គ្រូបង្រៀនហើយ ដោយក្នុងនោះមិនមែនត្រឹមតែប្រាក់បៀវត្សនោះទេ។ ប៉ុន្តែលោកគ្រូ-អ្នកគ្រូមានកិត្តិយស និងការទទួលស្គាល់ក្នុងសង្គម។ “ខ្ញុំគ្រាន់តែបង្ហើបទេ យើងបានរៀបចំគម្រោងរួចហើយ គម្រោងធំៗទាំងអស់មានប្រាំពីរ ប្រាំពីរហ្នឹងផ្ដោតខ្លាំងទៅលើគ្រូ ទៅលើសាលាតែម្តង។ អញ្ចឹងដើម្បីឱ្យគុណភាពអប់រំហ្នឹងខ្លាំង គឺការងារនេះត្រូវតែពង្រឹងដល់សាលារៀន។ សាលាត្រូវមានធនធានគ្រប់គ្រាន់ ត្រូវមានឧបករណ៍ សម្ភារគ្រប់គ្រាន់។ ត្រូវមានបរិស្ថានល្អ អញ្ចឹងកន្លងមកយើងមានប្រលងប្រណាំងគ្រូល្អ នាយកល្អ សាលារៀនស្អាត ហើយខ្ញុំចង់ជម្រាបថា បើសិនខ្ញុំនៅបន្តការងារនេះទៀត អាទិភាពដ៏ធំនៃកំណែទម្រង់ គឺគាំទ្រគ្រូ និងសាលារៀងយើង”៕
