ត្បូងឃ្មុំ៖នៅព្រឹកថ្ងៃទី១ ខែមករានេះ មានករណីក្មេងសិស្សសាលាចំនួន ៥នាក់ បានលង់ទឹកនៅចំនុចកញ្ចុះទើបធ្វើថ្មីមាត់ទន្លេពាមជីលាំង ស្ថិតក្នុងភូមិពាមជីលាំង ឃុំពាមជីលាំង ស្រុកត្បូងឃ្មុំខេត្តត្បូងឃ្មុំ។
ក្មេងសិស្សសាលាទាំង ៥ នាក់នោះ សុទ្ធតែក្មេងស្រីទាំងអស់។ បើតាមប្រភពពីកន្លែងកើតហេតុបានឲ្យដឹងថា មុនកើតហេតុ ជនរងគ្រោះបានចេញពីរៀនគួរអង់គ្លេសរួចក៏បបួលគ្នាទៅលេងទឹកនៅមាត់ទន្លេ។
ប៉ុន្តែជាអកុសលជនរងគ្រោះទាំង ៥នាក់បានធ្លាក់អន្លង់លង់ទឹកតែម្តង។ ភ្លាមៗអ្នកនៅក្បែរនោះបានជួយសង្គ្រោះបានក្មេងស្រី ២នាក់ ខណៈ ៣នាក់ផ្សេងទៀតបានបាត់បង់ជីវិត ។
សូមជម្រាបថា ជនរងគ្រោះទាំងអស់មានចំនួន ៥នាក់ សុទ្ធតែជាក្មេងសិស្ស សាលាមានអាយុក្រោម ១០ ឆ្នាំ៕
