ភ្នំពេញ៖ ប៉ូលិសខណ្ឌទួលគោក បានឃាត់ខ្លួនជនសង្ស័យប្រុស ស្រីពីរនាក់ជាមួយនឹងគ្រឿងញៀនម៉ាទឹកកកចំនួន៣៤កញ្ចប់ កាលពីរសៀលថ្ងៃទី១៤ ខែមីនា ឆ្នាំ២០១៨ នៅចំណុចច្រកលក់ធ្យូង ផ្លូវលេខ៣៣៦ ក្នុងសង្កាត់បឹងសាឡាង ខណ្ឌទូលគោក។ ពេលសមត្ថកិច្ចបង្ក្រាប ជនសង្ស័យកំពុងដេករួមរ័កគ្នា នៅក្នុងបន្ទប់ផ្ទះជួល។
លោកស៊ឹម ពិសិដ្ឋ អធិការរងប៉ូលិសខណ្ឌទួលគោកទទួលបន្ទុកផែនយុត្តិធម៌ បានឱ្យដឹងថា ជនសង្ស័យជាបុរសឈ្មោះ ចាន់ វាសនា អាយុ៣៥ឆ្នាំ និងម្នាក់ជាស្ត្រីឈ្មោះជា ស្រីណែត អាយុ៣០ឆ្នាំ ស្នាក់បន្ទប់ផ្ទះជួលក្នុងសង្កាត់បឹងសាឡាង ខណ្ឌទួលគោក។ ពួកគេត្រូវបានឃាត់ខ្លួនពីបទជាប់សង្ស័យជួញដូរ និងប្រើប្រាស់សារធាតុញៀនដោយខុសច្បាប់។
ជនសង្ស័យ ពេលនេះកំពុងឃាត់ខ្លួនសួរនាំនៅអធិការដ្ឋានប៉ូលិសខណ្ឌទួលគោក៕
