ពិតជាប្លែកមែនឆ្នាំនេះ!!! ក្នុងថ្ងៃទី១នៃពិធីបុណ្យសមុទ្រនៅខេត្តកោះកុង ថ្ងៃដំបូង ជាមួយនឹងការរត់ប្រណាំងកម្សាន្ត

0
699

(កោះកុង) ក្នុងថ្ងៃទី១នៃពិធីបុណ្យសមុទ្រនៅខេត្តកោះកុង កីឡាករជាយុវជន សិស្ស មន្ត្រីរាជការ ប្រជាពលរដ្ឋជាច្រើននាក់ រួមទាំងប្រជាពលរដ្ឋថៃផង បានចូលរួមក្នុងព្រឹត្តិការណ៍កីឡារត់ប្រណាំងកម្សាន្ត៣គីឡូ និង៥គីឡូ ដែលមានទីតាំងនៅរង្វង់មូលជាប់ស្ពានខេត្តកោះកុង។ លទ្ធផលនៃការប្រកួតនេះមានដូចខាងក្រោម៖ រត់ប្រណាំងកម្សាន្ត៣គីឡូម៉ែត្រ

ផ្នែកបុរស៖ ឈ្មោះ សុខ សំណាង (លេខ១), ឈ្មោះ សុប សារ៉ាប៊ុតន់ (លេខ២) និងឈ្មោះ សុវណ្ណ ចាន់ជុំភុន (លេខ៣)

ផ្នែកនារី៖ ឈ្មោះ ឆេង លី (លេខ១), ឈ្មោះ រឿន ធារ៉ា (លេខ២) និងឈ្មោះ ម៉ៃ ស្រីមុំ (លេខ៣)។ រត់ប្រណាំងកម្សាន្ត៥គីឡូម៉ែត្រ

ផ្នែកបុរស៖ ឈ្មោះ កាង ធឿន (លេខ១), ឈ្មោះ ប៉ែន តាង (លេខ២) និងឈ្មោះ នាង ពេជ្រពិសិដ្ឋ (លេខ៣)

ផ្នែកនារី៖ ឈ្មោះ អ៊ួន ច័ន្ទភត្រ្តា (លេខ១), ឈ្មោះ អ៊ុក ធារី (លេខ២) និងឈ្មោះ Kuso Sarika (លេខ៣)

សូមបញ្ជាក់ថា ប្រភេទកីឡាដែលមានក្នុងពិធីបុណ្យសមុទ្រឆ្នាំនេះរួមមាន៖ រត់ប្រណាំងកម្សាន្ត ទ្រីយ៉ាត្លុង ជិះកង់កម្សាន្ត អុកចក្ត្រង្គ ប្រដាល់គុនខ្មែរ ជេតស្គី ទូកក្តោង ថាសហោះ ម៉ូតូធំ សីស្លាប និងរាំអន្តរជាតិ។

តាមការបញ្ជាក់របស់លោក ប៊ុន បៀវ ប្រធានមន្ទីរទេសចរណ៍ខេត្តកោះកុង ប្រាប់ឲ្យដឹងថា មកដល់ពេលនេះ ផ្ទះសំណាក់ និងសណ្ឋាគារ នៅក្នុងក្រុងខេមរភូមិន្ទ ត្រូវបានភ្ញៀវទេសចរជួល និងកក់ទុកជិតពេញអស់ហើយ មានតែនៅតាមជាយៗក្រុងតិចតួចប៉ុណ្ណោះ ប៉ុន្តែភ្ញៀវទេសចរនៅមានជម្រើសទៅស្នាក់នៅខេត្តត្រាត ប្រទេសថៃក៏បានដែរ។ សម្រាប់ភ្ញៀវទេសចរដែលចង់ទៅស្នាក់នៅ និងទស្សនាកម្សាន្តនៅខេត្តត្រាត ប្រទេសថៃ ត្រូវថតចម្លងអត្តសញ្ញាណប័ណ្ណសញ្ជាតិខ្មែរ (Copy) មកជាមួយឱ្យបានស្រេច។ ខាងភាគីថៃបានត្រៀមបន្ទប់ស្នាក់នៅ សម្រាប់ភ្ញៀវទេសចរ ទៅពីកម្ពុជាដល់ទៅជាង៦០០បន្ទប់ឯណោះ ប៉ុន្តែមកដល់ពេលនេះ ភ្ញៀវទើបតែជួលអស់ជាង ១០០បន្ទប់ នៅឡើយទេ ពោលគឺនៅដល់ទៅជាង ៤០០បន្ទប់ទៀត។ សម្រាប់តម្លៃស្នាក់នៅខាងថៃវិញ គឺមិនលើសពី៣០ដុល្លារឡើយ។

នេះបើតាមការបញ្ជាក់របស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានថ្លែងថា ប្រជាពលរដ្ឋខ្មែរ ដែលទៅលេងបុណ្យសមុទ្រ ក្នុងរយៈពេល៣ថ្ងៃ ដែលគ្មានលិខិតឆ្លងដែន ក៏អាចឆ្លងទៅលេងដល់ខេត្តត្រាត ប្រទេសថៃបានដែរ ដោយគ្រាន់តែយកអត្តសញ្ញាណប័ណ្ណទៅជាមួយ។ បើចង់បើករថយន្តចូលខ្លួនឯង ត្រូវមានប័ណ្ណសម្គាល់យានយន្ត និងប័ណ្ណបើកបរ ហើយបើមានក្មេងតូចៗ ទៅជាមួយត្រូវយករូបថតទៅផង គឺមិនចាំបាច់មានលិខិតឆ្លងដែនក៏បាន។

លោកជំទាវ មិថុនា ភូថង អភិបាលខេត្តកោះកុង បានបញ្ជាក់ដែរថា សម្រាប់ប្រជាពលរដ្ឋដែលមិនចង់បើករថយន្តរបស់ខ្លួនទៅផ្ទាល់ទេ ក៏អាចផ្ញើរថយន្តនៅវត្តចាំយាម ក្បែរព្រំដែនកម្ពុជា-ថៃបាន ហើយគេនឹងមានរថយន្តពីខាងថៃមកទទួលទៀតផង។ ប្រសិនបើប្រជាពលរដ្ឋចង់ទៅស្នាក់ផ្ទះសំណាក់ សណ្ឋាគារនៅខ្លងយ៉ៃ ឬទីរួមខេត្តត្រាតក៏បានដែរ។

តាមការរំពឹងទុក ពិធីបុណ្យសមុទ្រឆ្នាំនេះនឹងទទួលបានភ្ញៀវទេសចរយ៉ាងតិច ៩ម៉ឺននាក់។ ទន្ទឹមនឹងនោះ ក្រសួងទេសចរណ៍ និងរដ្ឋបាលខេត្តកោះកុង ក៏បានសហការគ្នារៀបចំតំបន់រមណីយដ្ឋាន ទេសចរណ៍មួយចំនួនទៀត សម្រាប់ត្រៀមទទួលភ្ញៀវទេសចរក្នុងឱកាសបុណ្យសមុទ្រផងដែរ ដូចជា រមណីយដ្ឋានវិស្សមកាលតារាសាគរ តំបន់អេកូទេសចរណ៍ឆាយអារ៉ែង តាតៃ ព្រៃកោងកាង ឆ្នេរខ្សាច់ប៉ាក់ខ្លង រមណីយដ្ឋាន ចេតិយឃុនឆាង តំបន់ជុំវិញក្រុងខេមរភូមិន្ទ ព្រមទាំងកម្មវិធីកីឡា និងកម្មវិធីកម្សាន្តជាច្រើនទៀតផងដែរ។

សូមបញ្ជាក់ដែរថា បុណ្យសមុទ្រ ត្រូវប្រារព្ធធ្វើឡើងរយៈពេលបីថ្ងៃ គឺនៅថ្ងៃទី១៤-១៥-១៦ ខែធ្នូ ក្រោមប្រធានបទ ឆ្នេរស្អាត ពលរដ្ឋរមណី ហើយក៏មានការអញ្ជើញ ចូលរួមបើកជាផ្លូវការ ពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន៕

LEAVE A REPLY

Please enter your comment!
Please enter your name here