ក្រុមយក្សអេស្ប៉ាញ Real Madrid បានប្រកាសជាផ្លូវការក្នុងការតែងតាំងលោក Julen Lopetegui ឲ្យមកកាន់តំណែងអ្នកចាត់ការថ្មីរបស់ពួកគេ ខណៈដែលលោក Julen បានយល់ព្រមចុះកុងត្រារយៈពេល ៣ ឆ្នាំជាមួយក្រុមនៃក្របខ័ណ្ឌ La Liga មួយនេះ។ ដូចដែលយើងបានដឹងហើយថាអ្នកចាត់ការចាស់របស់ Real លោក Zinedine Zidane បានលាលែងពីតំណែងកាលពីខែមុន ក្រោយជួយឲ្យក្លិបលើកពាន Champions League រួច ខណៈដែលគ្រូជនជាតិបារាំងរូបនេះនិយាយថា Real មិនត្រូវការស្ដាប់សម្លេងគ្រូបង្វឹកដដែលទេ គឺពួកគេត្រូវការការផ្លាស់ប្ដូរ។
ការចាកចេញរបស់ Zidane ធ្វើឲ្យ Real ត្រូវបានគេផ្សាភ្ជាប់ជាមួយគ្រូបង្វឹកជាច្រើនរូបដែលអាចនឹងមកជំនួសកៅអីរបស់គាត់ ប៉ុន្តែជាលទ្ធផលគឺមិនដូចអ្វីដែលគេបានរំពឹងទុកនោះឡើយ ខណៈដែលពេលនេះ Real បានប្រកាសតែងតាំងលោក Julen ដែលមិនធ្លាប់មានសារពត៌មានណាផ្សាភ្ជាប់គាត់ទាល់តែសោះនោះឲ្យមកជំនួស Zidane ។ Julen ពីមុនធ្លាប់ដឹកនាំក្រុមយក្សរបស់ព័រទុយហ្គាល់ Porto បាន ២ ឆ្នាំដែរ មុនពេលទៅដឹកនាំក្រុមជម្រើសជាតិអេស្ប៉ាញនៅក្នុងឆ្នាំ ២០១៦ និងបន្តធ្វើមកដល់សព្វថ្ងៃ។ តែទោះជាយ៉ាងណា នៅពេលរួចពី World Cup ឆ្នាំ ២០១៨ ដែលនឹងចាប់ផ្ដើមការប្រកួតនាថ្ងៃ ១៤ ខាងមុខនេះ Julen នឹងផ្លាស់ពីតំណែងអ្នកចាត់ការក្រុមជម្រើសជាតិអេស្ប៉ាញទៅកាន់ការងារអ្នកចាត់ការនៅកីឡដ្ឋាន Bernabeu របស់ Real Madrid វិញ។
បុរសវ័យ ៥១ ឆ្នាំ, Julen ដែលជាអតីតអ្នកចាំទីរូបនេះធ្លាប់បង្ហាញខ្លួនលើទៅលានប្រកួតឲ្យ Real Madrid បានតែមួយប្រកួតឲ្យគត់ ប៉ុន្តែបង្ហាញខ្លួនបានដល់ទៅ ១០៧ ប្រកួតឲ្យក្រុម Logrones ។ គាត់បានចាប់ផ្ដើមអាជីពគ្រូបង្វឹកកាលពីឆ្នាំ ២០០៣ ដោយកាលនោះគឺគាត់ធ្វើជាជំនួយការគ្រូបង្វឹកក្រុមជម្រើសជាតិអេស្ប៉ាញអាយុក្រោម ១៧ ឆ្នាំ។ ក្រោយមកគាត់បានដឹកនាំក្រុមជម្រើសជាតិអេស្ប៉ាញពីក្រោមអាយុ ១៩ ដល់ ២០ ឆ្នាំ មុនពេលផ្លាស់ទៅកាន់ការងារនៅ Porto ។
ប្រែសម្រួល ៖ ភក្ដី
