ខ្សែប្រយុទ្ធឆ្នើមនៃក្រុមជម្រើសជាតិកម្ពុជា កីឡាករ ចាន់ វឌ្ឍនាកា ទីបំផុតបានចេញមកបកស្រាយ ក៏ដូចជាឆ្លើយតបទៅកាន់ពាក្យចរចាមអារ៉ាមដែលបានផ្សាភ្ជាប់រូបគាត់ទៅនឹងក្លិប Home United របស់សិង្ហបុរីដោយអតីតកីឡាកររបស់ក្រុមបឹងកេតរូបនេះបានប្រាប់ថាពាក្យចរចាមអារ៉ាមនោះមិនមែនជាពិតឡើយ ដូច្នេះសូមបងប្អូនអ្នកគាំទ្រទាំងអស់ឈប់បន្តយល់ច្រឡំ ឬសង្ស័យទៀតទៅ។
វឌ្ឍនាកា ដែលពេលនេះកំពុងស្ថិតក្នុងភាពទំនេរ និងពុំទាន់រកក្លិបថ្មីបានលេងនៅឡើយ បន្ទាប់ពីរូបគាត់ត្រូវបានក្រុមនៃលីកកំពូលរបស់ម៉ាឡេស៊ី Pahang FA ផ្ដាច់កុងត្រាកាលពីខែមុន។ ប៉ុន្តែទោះជាយ៉ាងណា កីឡាករវ័យ ២៤ ឆ្នាំមានដើមកំណើតពីខេត្តកំពតរូបនេះបានបង្ហើបឲ្យដឹងថាពេលនេះខ្លួនកំពុងស្ថិតក្នុងការចរចារជាមួយក្លិបបរទេសមួយ ខណៈដែលគាត់មិនបានប្រាប់ឲ្យដឹងថាជាក្លិបណាមួយ ឬក្លិបនៃលីករបស់ប្រទេសណានៅឡើយទេ គ្រាន់តែដឹងថាមិនមែនជាក្លិប Home United របស់សិង្ហបុរីនោះទេ។
រៀបរាប់នៅលើទំព័របណ្ដាញសង្គមហ្វេសប៊ុក វឌ្ឍនាកា កីឡាករដំបូងគេរបស់កម្ពុជាដែលបានទៅលេងនៅលីករបស់ជប៉ុនរូបនេះបានសរសេរយ៉ាងដូចច្នេះថា ៖ “សួស្ដីបងប្អូនទាំងអស់គ្នា! សុខសប្បាយជាទេ? សង្ឃឹមថាសុខសប្បាយទាំងអស់គ្នា។ សម្រាប់ខ្ញុំវិញ ប៉ុន្មានថ្ងៃចុងក្រោយនេះ ខ្ញុំសង្កេតឃើញមានពាក្យចចាមអារ៉ាមជាច្រើនជុំវិញអនាគតរបស់ខ្ញុំ។ ថ្ងៃនេះខ្ញុំចង់បញ្ជាក់ថាខ្ញុំកំពុងស្ថិតនៅរាជធានីភ្នំពេញ និងមិនមានការទៅហាត់ឬទៅធ្វើតេស្តនៅក្លិបណាទេ ហើយក៏មិនទាន់អូខេជាមួយក្លិបណានោះដែរ។ សូមបងប្អូនកុំយល់ច្រឡំ។ ខ្ញុំអាចបង្ហើបបានយ៉ាងខ្លីថាខ្ញុំកំពុងចរចាជាមួយក្លិបបរទេសពិតមែន ប៉ុន្តែមិនមែនក្លិបដែលបងប្អូននិងព័ត៌មានមួយចំនួនលើកឡើងនោះឡើយ។ ខ្ញុំនឹងប្រកាសជាផ្លូវការលើទំព័រហ្វេសប៊ុករបស់ខ្ញុំនេះនៅពេលណាការចរចាឈានដល់ការព្រមព្រៀង១០០%។ សូមអរគុណចំពោះការស្រលាញ់និងការយកចិត្តទុកដាក់របស់បងប្អូនទាំងអស់គ្នាមកលើរូបខ្ញុំ។ សូមប្រកបដោយសំណាងល្អនិងជោគជ័យទាំងអស់គ្នា៕”
អត្ថបទ ៖ ភក្ដី
