ព្រះរាជពិធីច្រត់ព្រះនង្គ័ល ត្រូវបានប្រារព្ធឡើងជារៀងរាល់ឆ្នាំ នៅថ្ងៃ៤រោច ខែពិសាខ ដើម្បីប្រកាស ប្រាប់ដល់ប្រជាកសិករថា រដូវធ្វើស្រែចម្ការបានមកដល់ហើយ។ ព្រះរាជពិធីបុណ្យច្រត់ព្រះនង្គ័ល ជាព្រះរាជប្បវេណីដ៏សំខាន់ ចាត់ទុកជាវប្បមង្គលមួយដ៏ប្រសើរ របស់ប្រជាពលរដ្ឋកម្ពុជា ដែលមហាក្សត្រគ្រប់ព្រះអង្គតែងតែដឹកនាំធ្វើពុំដែលខាន តាំងពីបុរាណកាលរៀងមក។
ហើយសម្រាប់ឆ្នាំនេះ ព្រះរាជពិធីបុណ្យច្រត់ព្រះនង្គ័ល ឆ្នាំ២០១៩ នឹងត្រូវប្រារព្ធឡើងនៅកីឡាដ្ឋានគិរីវង់សុខសែនជ័យ ស្ថិតនៅភូមិត្រពាំងអង្គ សង្កាត់រកាក្រៅ ក្រុងដូនកែវ ខេត្តតាកែវ។ អាជ្ញាធរខេត្ត នៅថ្ងៃទី១៨ ខែមេសា បានចុះត្រួតពិនិត្យទីតាំងភូមិសាស្ត្រ សម្រាប់ការរៀបចំព្រះរាជពិធីបុណ្យនេះ។
កាលពីឆ្នាំ២០១៨ ព្រះរាជពិធីច្រត់ព្រះនង្គ័ល បានប្រារព្ធធ្វើឡើង នៅទីព្រះស្រែ ស្ថិតក្នុងសង្កាត់ស្វាយរៀង ក្រុងស្វាយរៀង ខេត្តស្វាយរៀង។ ដោយឡែក កាលពីឆ្នាំ២០១៧ ព្រះរាជនេះប្រារព្ធឡើង នៅសកលវិទ្យាល័យកសិកម្ម ជាស៊ីម កំចាយមារ ក្នុងខេត្តព្រៃវែង៕
