លទ្ធផលដែលគួរឲ្យកត់សម្គាល់មួយទៀត គឺគណបក្សអណាខុតម៉ៃ ដែលទើបនឹងបង្កើតថ្មី បានទទួលសំឡេងឆ្នោតគាំទ្រច្រើនជាងគេលំដាប់ទី៣ (៥លានសន្លឹក) ពោលគឺ បានច្រើនជាងគណបក្សប្រជាធិបតេយ្យរបស់លោកអាភិស៊ីតទៅទៀត ដែលជាគណបក្សដ៏ចំណាស់បំផុតនៅក្នុងប្រទេសថៃ ហើយដែលស្ថិតនៅលំដាប់ទី៤ (ជាង ៣លានសន្លឹក) ស្ទើរតែស្មើគ្នាជាមួយនឹងគណបក្សភូមិចៃថៃ ជាង ៣លានសន្លឹក។
កាន់តែធ្ងន់ធ្ងរជាងនេះទៅទៀត គឺគណបក្សប្រជាធិបតេយ្យទំនងជានឹងមិនទទួលបានអាសនៈណាមួយសោះ នៅក្នុងចំណោមអាសនៈទាំង ៣០ នៅក្នុងទីក្រុងបាងកក ដែលធ្លាប់តែជាសម្បុកនៃអ្នកគាំទ្រគណបក្សប្រជាធិបតេយ្យតាំងពីដើមមក។ ភ្លាមៗក្រោយពីបានឃើញលទ្ធផលដ៏គួរឲ្យខកចិត្តនេះ លោកអាភិស៊ីតក៏បានប្រកាសលាឈប់ពីមុខតំណែងជាមេដឹកនាំគណបក្សប្រជាធិបតេយ្យ ដូចអ្វីដែលលោកធ្លាប់បានសន្យាកាលពីមុន ដែលថា លោកនឹងលាឈប់ប្រសិនបើគណបក្សប្រជាធិបតេយ្យទទួលបានតិចជាង ១០០អាសនៈ នៅក្នុងការបោះឆ្នោតនេះ។
នៅប្រមាណជា ម៉ោង ១០យប់ ថ្ងៃបោះឆ្នោត នៅក្នុងពេលដែលការរាប់សន្លឹកឆ្នោតនៅទូទាំងប្រទេសត្រូវបានគេធ្វើចប់ជាង ៩០% ហើយនោះ លទ្ធផលក្រៅផ្លូវការ ដែលបានមកពីគណៈកម្មាធិការជាតិរៀបចំការបោះឆ្នោត បង្ហាញថា គណបក្សផាឡាំងប្រាឆារ៉ាត់ទទួលបានសន្លឹកឆ្នោតគាំទ្រនាំមុខគេ គឺបានរហូតដល់ទៅ ៧លាន៦សែនសន្លឹក នាំមុខគណបក្សភឿថៃ ដែលទទួលបានតែជាង ៧លានសន្លឹក។
