សម្ដេច ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា បានប្រកាសបញ្ចេញថវិកាជូនជូនគ្រួសារជនរងគ្រោះ ដោយការបាក់អគារនៅខេត្តព្រះសីហនុ ពោលគឺគ្រួសារអ្នកស្លាប់ម្នាក់ ចំនួន ៤០លានរៀន (១ម៉ឺនដុល្លារ) ចំណែកអ្នករងរបួស ទទួលបានការព្យាបាលនៅមន្ទីរពេទ្យរដ្ឋដោយមិនគិតថ្លៃ និងថវិកា ៥លានរៀន។
សម្ដេចតេជោ ដែលកំពុងស្ថិតនៅប្រទេសថៃ ដើម្បីចូលរួមប្រជុំកំពូលអាស៊ាន បានសរសេរនៅលើទំព័រហ្វេសប៊ុកសម្ដេច ដែលមានខ្លឹមសារទាំងស្រុងដូចខាងក្រោម៖
“បងប្អូនជនរួមជាតិជាទីគោរពស្រឡាញ់។ សោដនាដកម្មបាក់អាគារនៅខេត្តព្រះសីហនុ គឺជារឿងឈឺ ចាប់របស់ជាតិយើង ពិសេសក្រុមគ្រួសារនៃអ្នកដែលបានបាត់បង់ជិវិតដែលជាភរិយា ឬស្វាមី ឬកូន ឬឪពុកម្តាយ។ល។ ដើម្បីចូលរួមមរណៈទុក្ខ និងជួយដល់ជីវភាពក្រុមគ្រួសារ ក្នុងនាមរាជរដ្ឋាភិបាល ខ្ញុំសម្រេចបញ្ចេញថវិកាជាតិជួយដល់ក្រុមគ្រួសារអ្នកស្លាប់ក្នុងមួយនាក់ ៤០លានរៀល (សែសិបលានរៀល) ឬ១មុឺនដុល្លា (10.000$)។ សម្រាប់អ្នកត្រូវរបួសទាំងអស់ ត្រូវទទួលបានការព្យាបាល ដោយឥតគិត ថ្លៃនៅតាមមន្ទីរពេទ្យរដ្ឋ និងទទួលបានជំនួយក្នុងមួយនាក់ចំនួន ៥លានរៀល (ប្រាំលានរៀល)។ ឯកឧត្តម ប៊ិន ឈិន ឧបនាយករដ្ឋមន្ត្រីប្រចាំការ និងជារដ្ឋមន្រ្តីទីស្តីការគណៈរដ្ឋមន្ត្រីទទួលចាត់ចែងថវិកានេះជូនបងប្អូន។ យប់នេះខ្ញុំនៅបន្តតាមដានការងាររុករក និងសង្រ្គោះជាមួយបងប្អូនតទៅទៀត”៕
សូមបញ្ជាក់ថា គិតត្រឹមម៉ោង ៦កន្លះព្រឹកថ្ងៃទី២៣ ខែមិថុនានេះ ចំនួនអ្នកស្លាប់ បានកើនដល់ ១៧នាក់ និងអ្នករបួស ២៤នាក់។ ប្រតិបត្តិការជួយសង្គ្រោះកំពុងបន្តធ្វើទៀត៕ ប្រភពKLAY KLAY
