ភ្នំពេញ៖បុរសម្នាក់បើករថយន្តទំនើបមួយគ្រឿងក្នុងលក្ខណះស្រវឹងជោកជាំ ដោយមានការធ្វេសប្រហែស ហើយបើកហួសល្បឿនផងក៏ជ្រុលទៅបុកកង់បីឥណ្ឌាពីក្រោយពេញទំហឹង បណ្ដាលឲ្យបុរសជាម្ចាស់កង់បី បែកក្បាលរងរបួសស្រាល ហើយរថយន្តមិនទាន់អស់ល្បឿនក៏បន្តឡើងសួនរង្វង់មូល ព្រហ្មមុខបួនបង្កអោយមានការភ្ញាក់ផ្អើលនិងរងការខូចខាតយ៉ាងដំណំ។
ករណីគ្រោះថ្នាក់ចរាចរណ៏នេះបានកើតឡើង នៅវេលាម៉ោង១២ និង៣០នាទីយប់រំលងអធ្រាត្រ ឈានចូលថ្ងៃទី០២ ខែកក្កដា ឆ្នាំ២០១៩ ស្ថិតនៅចំណុចគល់ស្ពានជ្រោយចង្វាត្រើយខាងកើត ក្នុងសង្កាត់ជ្រោយចង្វា ខណ្ឌជ្រោយចង្វា។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ស្រវឹងស្រា បើករថយន្តទំនើបម៉ាកឡង់គ្រីស័រ ពណ៌ស ពាក់ស្លាកលេខខេមរ:ភូមិន្ទ 01.2.1366 ធ្វើដំណើរពីលិចឡើងស្ពានទៅកើត ខណ:មកដល់ចំណុចកើតហេតុ រថយន្ដបានជ្រុលទៅបុកម៉ូតូកង់បីឥណ្ឌា ពណ៌ស ពាក់ស្លាកលេខ ភ្នំពេញ 1HQ -0545 បើកបរដោយបុរសម្នាក់ រងរបួសបែកក្បាលស្រាល រីឯរថយន្តមិនទាន់អស់ល្បឿន បានជ្រុលឡើងរង្វង់មូលតាព្រហ្មធ្វើឲ្យបាក់ដើមឈើបីដើម ចំណែកម៉ូតូកង់បី និងរថយន្តខូចខាតយ៉ាងដំណំ។
បន្ទាប់ពីកើតហេតុរួចសមត្ថកិច្ច បានចុះមកវាស់វែង ហើយនាំយករថយន្តបង្ក និងម៉ូតូកង់បីឥណ្ឌា ទៅរក្សាទុកដើម្បីរង់ចាំភាគីទាំងសងខាងចូលមកដោះស្រាយតាមផ្លូវច្បាប់ ចំណែកជនរងគ្រោះត្រូវបានសមត្ថកិច្ចបញ្ជូនទៅមន្ទីរពេទ្យ ៕
