នគរបាលព្រហ្មទណ្ឌកម្រិតស្រាលបង្ហាញមុខក្រុមជនសង្ស័យ ៧នាក់ ពាក់ព័ន្ធនឹងករណីប្លន់ ជាង១០ករណី យកម៉ូតូ និងឆក់ទ្រព្យសម្បត្តិ

ភ្នំពេញ៖ នៅព្រឹកថ្ងៃទី១៣ ខែកុម្ភៈ ឆ្នាំ២០១៩នេះ លោកវរៈសេនីយ៍ឯក ប៊ុន សន្យា នាយការិយាល័យនគរបាលព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ បានធ្វេីការបង្ហាញមុខក្រុមជនសង្ស័យចំនួន ៧នាក់ ដែលពាក់ព័ន្ធនឹងករណីប្លន់យកម៉ូតូ និងឆក់ទ្រព្យសម្បត្តិ របស់បងប្អូនប្រជាពលរដ្ឋកាលពីពេលថ្មីៗនេះ។

លោកវរៈសេនីយ៍ឯក ប៊ុន សន្យា បានឲ្យដឹងថា ដោយមានការចង្អុលបង្ហាញពីឯកឧត្តម ឧត្តមសេនីយ៍ឯក អគ្គស្នងការរង និងជាស្នងការនគរបាលរាជធានីភ្នំពេញ លោកឧត្តមសេនីយ៍ទោ សុង លី ស្នងការរងទទួលផែនការងារនគរបាលព្រហ្មទណ្ឌ និងមានការសម្របសម្រួលពីលោក ប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។

លោក ប៊ុន សន្យា បានប្រាប់ថា ដោយនៅថ្ងៃទី១០ និងថ្ងៃទី១១ ខែកុម្ភៈ ឆ្នាំ២០១៩ កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ បានសហការណ៍ជាមួយកម្លាំងអធិការដ្ឋាននគរបាលខណ្ឌច្បារអំពៅ និងកម្លាំងអធិការដ្ឋាននគរបាលខណ្ឌមានជ័យ បានបើកការស្រាវជ្រាវរហូតឈានដល់ការកំណត់មុខសញ្ញា និងឃាត់ខ្លួនបានជនសង្ស័យជាបន្តបន្ទាប់ចំនួន ៧នាក់ ដែលបានប្រព្រឹត្តបទល្មើស អំពើលួចមានស្ថានទម្ងន់ទោស (ប្លន់យកម៉ូតូ និងឆក់ទ្រព្យសម្បត្តិ) ពីប្រជាពលរដ្ឋចំនួន ១៥ករណី៕