កម្ពុជា-ឥណ្ឌូនេស៊ី កំពុងជំរុញឲ្យមានការហោះហើរត្រង់ឡើងវិញ បន្ទាប់ពីខកខាននៃការហោះហើរ ត្រង់អស់ជិតកន្លះសតវត្សរ៍ ពោលគឺចាប់ពីក្រោយឆ្នាំ១៩៧០មក ហើយបើតាមរដ្ឋមន្ត្រីក្រសួងទេសចរណ៍ លោក ថោង ខុន ការហោះហើរត្រង់ថ្មីនេះ នឹងចាប់ផ្ដើមឡើងក្នុងពេលឆាប់ៗខាងមុខ។
ក្នុងជំនួបរវាង ឯកឧត្តមរដ្ឋមន្ត្រី ថោង ខុន ជាមួយលោក ស៊ូឌីម៉ាន់ ហាសេង ឯកអគ្គរដ្ឋទូតឥណ្ឌូ នេស៊ីប្រចាំកម្ពុជា ដែលបានដឹកនាំប្រតិភូនៃក្រុមហ៊ុនអាកាសចរណ៍ឥណ្ឌូណេសុី CITILINK នៅទីស្ដីការក្រសួងទេសចរណ៍ នាព្រឹកថ្ងៃទី៧ ខែកុម្ភៈនេះ ភាគីឥណ្ឌូនេស៊ីបានសម្រេចថា នឹងបើកឲ្យមានការហោះហើរឡើងវិញ អាចនៅក្នុងឆមាសទី២ ឆ្នាំ២០១៩ ខាងមុខនេះ។
ឯកឧត្តម ថោង ខុន បានឲ្យដឹងថា ក្នុងចំណោមបណ្តា ប្រទេសជាសមាជិកអាស៊ាន មានតែឥណ្ឌូនេស៊ី និងប្រ៊ុយណេទេ ដែលមិនទាន់មានការហោះហើរត្រង់មកកម្ពុជា តែដោយសារការខិតខំ ចរចារវាងភាគីទាំងពីរ ពិសេស ថ្នាក់ដឹកនាំនៃប្រទេសទាំង២ ទើបនាពេលខាងមុខ នឹងមានការហោះ ហើរត្រង់ពីឥណ្ឌូនេស៊ីមកកាន់កម្ពុជាឡើងវិញ បន្ទាប់ពីខកខានអស់ជិតកន្លះសតវត្សរ ហើយក៏ការហោះហើរនេះក៏គឺជាការរួមចំណែកយ៉ាងសំខាន់ដល់ការបង្កើនការតភ្ជាប់ផ្ទែក្នុងអាស៊ាន
ឯកឧត្តម រដ្ឋមន្ត្រីបានបន្តថា នៅពេលដែលមានការ ហោះហើរត្រង់ពីឥណ្ឌូនេស៊ីមកកាន់កម្ពុជាឡើងវិញ កម្ពុជាសង្ឃឹមថាវានឹងនាំមកនូវភ្ញៀវទេស ចរច្រើនឡើងបន្ថែមទៀត ជាពិសេសទេសចរឥណ្ឌូនេស៊ី ខណៈដែលបច្ចុប្បន្នមានត្រឹមតែជាង ៥ម៉ឺននាក់ក្នុងមួយឆ្នាំតែប៉ុណ្ណោះ។
ឯកអគ្គរដ្ឋទូតឥណ្ឌូនេស៊ី បានឲ្យដឹងថា កម្ពុជា-ឥណ្ឌូនេស៊ី ចាំបាច់ត្រូវមានកិច្ចសហការនៅលើគ្រប់វិស័យ ក្នុងនោះក៏មានវិស័យទេសចរណ៍ផងដែរ ដូច្នេះការបើកឲ្យមានការហោះហើរត្រង់ ឡើងវិញរវាង ប្រទេសទាំងពីរ គឺជារឿងចាំបាច់។
ឯកឧត្តម បានបន្តថា កម្ពុជា-ឥណ្ឌូនេស៊ី នឹងប្រារព្ធខួបលើកទី៦០ នៃការតភ្ជាប់ទំនាក់ទំនងការទូតជាមួយគ្នា ហើយថា ការសម្រេចឲ្យមានការហោះហើរត្រង់ នាពេលខាងមុខនេះ ក៏គឺជាការអនុវត្តជាក់ ស្តែងនូវបំណងប្រាថ្នារបស់អនុប្រធានាធិបតីឥណ្ឌូនេស៊ី និងសម្តេចតេជោនាយករដ្ឋមន្ត្រី ហ៊ុន សែន ក្នុងជំនួបថ្មីៗ នេះ កាលពីថ្ងៃទី១៦ មករា ២០១៩ នៅខេត្តសៀមរាប និងជាចំណងដៃដ៏មានសារសំខាន់នៃការប្រារព្ធខួបមួយនេះ គួបផ្សំនឹងការរៀបចំនូវកម្មវិធីមួយចំនួនទៀត ដូចជា ការរៀបចំពិព័រណ៍រួមគ្នា ការរៀបចំព្រឹត្តិការណ៍កីឡាជាលក្ខណៈមិត្តភាព រួមនឹងវេទិកាផ្សេងៗទៀត ដើម្បីលើកកម្ពស់ទំនាក់ទំនងរវាងប្រទេសទាំងពីរ ក៏ដូចជាជំរុញដល់ការអភិវឌ្ឍនៅកម្ពុជា តាមរយៈវិស័យទេសចរណ៍ផងដែរ៕
