ភ្នំពេញ ៖ រថយន្តព្រូសមួយគ្រឿងបើកបោះពួយយ៉ាងលឿនមិនប្រយ័ត្នក៏ជ្រុលទៅបុករថយន្តហា យឡែនឌ័រមួយគ្រឿង ដែលបើកឆ្លងផ្លូវខ្ទាតទៅបុករថយន្តព្រូសមួយគ្រឿងទៀត បណ្តាលឲ្យរងការខូចខាតយ៉ាងដំណំ កាលពីវេលាម៉ោង១០និង៥០នាទីយប់ថ្ងៃទី០៥ ខែកុម្ភៈ ឆ្នាំ២០១៩ ត្រង់ចំណុចស្តុប២៤ម៉ោង តាមបណ្ដោយផ្លូវឧកញ្ញ៉ាម៉ុងរិទ្ធី កែងនិងផ្លូវហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើករថយន្តមួយគ្រឿងម៉ាកហាយឡែនឌ័រ ពណ៌ស ពាក់ស្លាកលេខ ភ្នំពេញ 2AS-5323 ធ្វើដំណើរតាមបណ្ដោយផ្លូវសម្ដេចជា ស៊ីម ក្នុងទិសពីលិចទៅកើត ។
លុះមកដល់ចំណុចកើតហេតុក៏បានបើកឆ្លងកាត់ផ្លូវហាណូយ បម្រុងឆ្ពោះទៅផ្លូវឧកញ្ញម៉ុងរិទ្ធី តែខណៈពេលដែលបើកឆ្លងជិតផុតហើយនោះក៏ស្រាប់តែមានរថយន្តមួយគ្រឿងទៀតម៉ាកតូយូតាព្រូស ពណ៌កណ្តុរប្រមេះ ពាក់ស្លាកលេខ ភ្នំពេញ 2AG-1604 បើកបរដោយបុរសម្នាក់តាមបណ្ដោយផ្លូវហាណូយ ក្នុងទិសដៅពីត្បូងទៅជើង និងក្នុងល្បឿនយ៉ាងលឿនខ្វះការប្រុងប្រយ័ត្នក៏ជ្រុលទៅបុករថយន្តហាយឡែកឌ័រ ពេញទំហឹង បណ្ដាលឲ្យរថយន្តហាយឡែនឌ័រ រងការខូចខាត ក្រពឹត និងបាក់កាឡេកង់ខាងមុខចំហៀងខាងឆ្វេង ។
ចំណែករថយន្តបង្កបានខ្ទាតទៅបុកចំពីមុខរថយន្តមួយគ្រឿងទៀតម៉ាកតូយូតាព្រូស ពណ៌ស បើកបរដោយនារីម្នាក់ តាមបណ្ដោយផ្លូវឧកញ្ញ៉ាម៉ុងរិទ្ធី ក្នុងទិសដៅពីកើតទៅលិចបណ្តាលឲ្យរងការខូចខាតក្រពឹតកាងផ្នែងខាងមុខ ចំណែកឯរថយន្តបង្ករងការខូចខាតផ្នែកខាងមុខ និងចំហៀងខាងឆ្វេងយ៉ាងដំណំ ប៉ុន្តែមិនបង្កឲ្យមានអ្នករងរបួសនោះទេ ។
ក្រោយពេលកើតហេតុសមត្ថកិច្ចមូលដ្ឋានក៏បានចុះមកដល់កន្លែងកើតហេតុទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយករថយន្តទាំងបីគ្រឿងខាងលើទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ ៕
ប្រភព៖ FB
