ជាទូទៅ រៀងរាល់ឆ្នាំ ឲ្យតែដល់ថ្ងៃសែន និងថ្ងៃចូលឆ្នាំចិនម្តងៗ សាលារៀន ទាំងសាលារដ្ឋ និងទាំងសាលារៀនឯកជន រួមទាំងក្រុមហ៊ុន និងស្ថាប័នរដ្ឋមួយចំនួន បានបិទទ្វារ មិនបង្រៀន និងមិនធ្វើការឡើយ។ ក៏ប៉ុន្តែនៅឆ្នាំនេះ រដ្ឋមន្ត្រីក្រសួងអប់រំ យុវជន និងកីឡា ឯកឧត្តមរដ្ឋមន្ត្រី ហង់ជួនណារ៉ុន បានប្រកាសណែនាំឲ្យសាលារៀន បន្តបើកទ្វារបង្រៀនសិស្ស នៅថ្ងៃសែន និងថ្ងៃចូលឆ្នាំចិន ដែលនឹងចូលមកដល់នៅថ្ងៃទី០៤ ខែកុម្ភៈ ដើមសប្តាហ៍ក្រោយនេះ។
ឯកឧត្តមរដ្ឋមន្ត្រី ហង់ជួន ណារ៉ុន បានប្រកាសដូច្នេះ ក្នុងសន្និសីទសារព័ត៌មាន ស្តីពី ការរៀបចំមហោស្រពវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា លើកទី៥ កាលពីរសៀលថ្ងៃទី៣១ ខែមករា ឆ្នាំ២០១៩។ មហោស្រពជាតិ ស្ដីពី វិទ្យាសាស្ត្រ និងវិស្វកម្មកម្ពុជា លើកទី៥ នឹងធ្វើឡើងរយៈពេល ៣ ចាប់ពីថ្ងៃទី២១-២២-២៣ ខែកុម្ភៈ ឆ្នាំ២០១៩ នៅពហុកីឡដ្ឋានជាតិអូឡាំពិក ក្នុងរាជធានីភ្នំពេញ។
ឯកឧត្តមរដ្ឋមន្ត្រី ហង់ ជួនណារ៉ុន បានបញ្ជាក់ថា “យើងបានចេញសេចក្តីណែនាំមួយហើយ គឺថា សាលានីមួយៗ ត្រូវអនុវត្តកម្មវិធីសិក្សាឲ្យបានពេញលេញ ហើយឆ្លៀតក្នុងឱកាសនេះ ខ្ញុំក៏សូមអំពាវនាវដល់ឪពុកម្តាយ មាតាបិតា ឲ្យបញ្ជូនកូនមករៀន ព្រោះអី យើងឲ្យសាលានៅបន្តអនុវត្តបង្រៀន គ្រូឲ្យទៅសាលា ប៉ុន្តែពេលខ្លះ គ្រូទៅសាលា តែអត់មានសិស្ស។ អីចឹង ខ្ញុំសូមឆ្លៀតឱកាសនេះ អំពាវនាវ សូមឲ្យមាតាបិតាសិស្ស មេត្តាកុំរៀបចំ គេហៅថា ទៅដើរលេងនៅខេត្តអី ទុកឲ្យកូន គាត់មករៀន។
អីចឹង បញ្ហាចូលឆ្នាំចិន មិនមែនកូនមិនចង់រៀនទេ ជួនកាលម៉ែឪ គឺគាត់ដាក់កម្មវិធីទៅខេត្ត ឬក៏ទៅដើរលេងនៅឯណាអី។ អីចឹង សូមអំពាវនាវដល់អាណាព្យាបាល មាតាបិតាសិស្ស សូមកុំរៀបចំកម្មវិធីនៅខេត្ត ហើយឲ្យកូនបានបន្តមករៀនសូត្រ ជាប្រក្រតី ហើយសាលាទាំងអស់ យើងបានដាក់ចេញហើយនូវសេចក្តីណែនាំថា ត្រូវបើកទ្វារបង្រៀននៅពេលចូលឆ្នាំចិន”។
យ៉ាងណាក៏ដោយ ពាក់ព័ន្ធនឹងពិធីសែនចូលឆ្នាំចិន នាថ្ងៃទី០៤ ខែកុម្ភៈ រួមទាំងពិធីចូលឆ្នាំចិន នៅឆ្នាំនេះ ចាប់ពីថ្ងៃទី០៥ ដល់ថ្ងៃទី០៧ ឆ្នាំ២០១៩ ក្រសួងអប់រំ យុវជន និងកីឡា ក៏បានកំណត់ រៀបចំកិច្ចប្រជុំបូកសរុបការងារ ឆ្នាំ២០១៧-២០១៨ និងលើកទិសដៅ ឆ្នាំ២០១៨-២០១៩ ដើម្បីវាយតម្លៃវឌ្ឍនភាពអនុវិស័យអប់រំកាយ និងកីលា និងប្រមូលធាតុចូលពីគ្រប់ភាគីពាក់ព័ន្ធ លើសមិទ្ធផលការងារ បញ្ហាប្រឈម សម្រាប់ដាក់បញ្ចូលក្នុងសន្និបាតបូកសរុប វាយតម្លៃលទ្ធផលការងារអប់រំ យុវជន និងកីឡា និងលើកកម្ពស់ប្រសិទ្ធភាពការងារអប់រំកាយ និងកីឡា ក្នុងការត្រៀមលក្ខណៈ ធ្វើម្ចាស់ផ្ទះនៃការប្រកួតកីឡាស៊ីហ្គេម លើកទី៣២ ឆ្នាំ២០២៣។
សន្និបាតនេះ មានរយៈពេល ២ថ្ងៃ គឺនៅថ្ងៃទី៤ និងថ្ងៃទី៥ ខែកុម្ភៈ ឆ្នាំ២០១៩ នៅភោជនីយដ្ឋានទន្លេបាសាក់ ២ ក្នុងរាជធានីភ្នំពេញ។
យ៉ាងណាក៏ដោយ ពាក់ព័ន្ធនឹងពិធីបុណ្យចូលឆ្នាំចិន គឺនៅកម្ពុជា ពិសេសនៅរាជធានីភ្នំពេញ មានសាលាឯកជនមួយចំនួន បានចេញសេចក្តីជូនដំណឹងយូរថ្ងៃមកហើយ ពីការឈប់សម្រាក រយៈពេល ៤ថ្ងៃ គឺចាប់ពីថ្ងៃទី០៤ ដល់ថ្ងៃទី០៧ ខែកុម្ភៈ ឆ្នាំ២០១៩ ដោយសារឯកជនភាសាខ្មែរ និងរៀនអង់គ្លេសទាំងនោះ បានសរសេរធំៗថា “បុគ្គលិក លោកគ្រូ អ្នកគ្រូ និងសិស្សានុសិស្ស នៃសាលាវេស្ទើនអន្តរជាតិ ត្រូវបានឈប់សម្រាកចំនួន ៤ថ្ងៃ គឺនៅថ្ងៃទី៤ ទី៥ ទី៦ និងថ្ងៃទី៧ ខែកុម្ភៈ ឆ្នាំ២០១៩ ក្នុងពិធីបុណ្យចូលឆ្នាំចិនR#8221;។
ចំពោះសេចក្តីជូនដំណឹងនេះ ត្រូវបានអាណាព្យាបាលសិស្ស បង្ហោះក្នុងហ្វេសប៊ុក ហើយបានសរសេរថា “អត់យល់សាលារៀនវេស្ទើនអន្តរជាតិ ឈប់យូរម្លេះ មិនឈប់ ១អាទិត្យដាច់តែម្តងទៅ?”។
អាណាព្យាបាលឪពុកម្តាយសិស្ស បានលើកឡើងពីថ្លៃសាលា គឺ ១០ដុល្លារ ក្នុង១ថ្ងៃ ហើយកូនគាត់រៀនដល់ទៅ ២នាក់ ដូច្នេះការឈប់សម្រាក ៤ថ្ងៃនេះ គឺគាត់ត្រូវខាតបង់អស់ ៨០ដុល្លារអាមេរិក។ អាណាព្យាបាលឪពុកម្តាយសិស្ស បានសរសេរថា សាលា គួរតែឈប់តាមប្រតិទិនរបស់ខ្មែរ ទើបត្រូវ។
យ៉ាងណាក៏ដោយ ការឈប់សម្រាកពេលចូលឆ្នាំចិន បានកើតឡើងស្ទើរតែរាល់ឆ្នាំ គ្រាន់តែតាមសាលារៀនរដ្ឋ និងសាលាឯកជន ក្រុមហ៊ុន និងក្រសួងមន្ទីរមួយចំនួន បានឈប់សម្រាកដោយស្ងាត់ៗ មិនមានប្រកាសជាចំហរដូចនៅឆ្នាំនេះ ហើយនៅឆ្នាំនេះ នៅតាមបុរីមួយចំនួន ដូចជា នៅបុរីផ្ទះល្វែង និងវីឡា Grand Phnom Penh តាមមហាវិថីហាណូយ នៅជាយរាជធានីភ្នំពេញ តាមក្រុមហ៊ុននៅកណ្តាលក្រុង ដូចជា នៅបណ្ណាគារអន្តរជាតិ IBC ក្រុមហ៊ុនទូរស័ព្ទ Cell Card ជាដើម បានរៀបចំជាក្លោងទ្វារ លើកស្លាក អបអរសាទរពិធីបុណ្យចូលឆ្នាំចិនយ៉ាងធំៗថែមទៀតផង។
ការអបអរពិធីបុណ្យចូលឆ្នាំចិនជាចំហរ និងអធិកអធមជាងឆ្នាំមុនៗ នៅក្នុងប្រទេសកម្ពុជា នាពេលនេះ បានធ្វើឡើង ខណៈដែលជនជាតិចិន កាន់តែច្រើន បានចូលមករស់នៅ រកស៊ីនៅប្រទេសកម្ពុជា ពិសេសនៅខេត្តព្រះសីហនុ និងនៅរាជធានីភ្នំពេញ ព្រមទាំងនៅតាមទីប្រជុំជន ទីរួមខេត្តជាច្រើនផ្សេងទៀត នៅទូទាំងប្រទេសកម្ពុជា៕
