ថៃ៖ ក្រុងបាងកកបានសម្រេចប្រើប្រាស់យន្តហោះ Drone ចំនួន ៦ គ្រឿងដើម្បីបាញ់ទឹកនៅតំបន់ ដែលមានផ្សែង និងខ្យល់កខ្វក់ បើតាមនាយឧត្តមសេនី Aswin Kwanmuang បានប្រាប់អ្នកសារព័ត៌មានថា យន្តហោះ Drone នេះត្រូវបានសាលាក្រុងបាងកកខ្ចីពីក្លឹបកសិកម្មនៅក្នុងខេត្ត Nakhon Ratchasima និងខេត្ត Chaiyaphum ដែលក្លឹបនេះមានយន្តហោះ Drone រហូតដល់ទៅ ៥០ ឯណោះសម្រាប់ប្រើប្រាស់ក្នុងការងារកសិកម្ម។
យន្តហោះ Drone ត្រូវបានគេភ្ជាប់ជាមួយនឹងទឹកពី ៥-១០ លីត្រ ហើយយន្តហោះមួយគ្រឿងអាចធ្វើការហោះហើរ និងបាញ់ទឹកបានក្នុងរយៈពេលពី ១៥-២០ នាទី និងត្រូវបានគេប្រើប្រាស់នៅតំបន់ ៦ ផ្សេងគ្នាផងដែរ។ សាលាក្រុងបាងកកបានបញ្ជាក់ថា ការប្រើប្រាស់យន្តហោះ Drone បាញ់ទឹកនេះ អាចជួយបន្ថយបញ្ហាបានខ្លះ តែវាមិនអាចលុបបំបាត់បញ្ហាបានទាំងស្រុងនោះទេ។
សូមរម្លឹកឡើងវិញថា បញ្ហាមានផ្សែងនិងខ្យល់កខ្វក់នេះបានវាយប្រហារក្រុងបាងកកជាច្រើនសប្តាហ៍មកហើយ ហើយនៅតំបន់ខ្លះគឺមានលក្ខណៈធ្ងន់ធ្ងរដែលអាចប៉ះពាល់ដល់ការរស់នៅ រកស៊ីរបស់ប្រជាពលរដ្ឋ និងរហូតដល់មានសាលារៀន ចំនួន ៤៣៧ កន្លែងត្រូវបិទទ្វារទៀតផង៕
ប្រភព៖ FB
