អតីតរដ្ឋមន្ត្រីក្រសួងការពារជាតិអាមេរិច លោក Jim Mattis បានធ្វើការបន្ទោសដល់ប្រធានាធិបតី ដូណាល់ ត្រាំ នៅថ្ងៃពុធ ដោយបានធ្វើការចោទប្រកាន់លោកថា ព្យាយាមបំបែកអាមេរិច និងមិនបានបង្ហាញពីភាពជាអ្នកដឹកនាំចាស់ទុំ ខណៈដែលមានការតវ៉ាទូទាំងប្រទេសប្រឆាំងនឹងការរើសអើងជាតិសាសន៍។
លោក Jim Mattis ដែលបានលាលែងពីតំណែងកាលពីខែធ្នូ ឆ្នាំ ២០១៨ ដោយសារតែលោកដូណាល់ ត្រាំបញ្ជាឲ្យដកទ័ពទាំងអស់ចេញពីប្រទេសស៊ីរី ក៏បានសម្តែងការគាំទ្រដល់ក្រុមបាតុករប្រឆាំងនឹងការរើសអើងជាតិសាសន៍ផងដែរ។
លោកបានសរសេរក្នុងសេចក្តីប្រកាសតាមអនឡាញដូច្នេះថា “ដូណាល់ ត្រាំ គឺជាប្រធានាធិបតីទី ១ក្នុងឆាកជីវិតរបស់ខ្ញុំ ដែលមិនព្យាយាមបង្រួបបង្រួមប្រជាជាតិអាមេរិចទេ ថែមទាំងគ្មានបំណងទៀត”។
លោកថ្លែងបន្តទៀតថា “ផ្ទុយទៅវិញ លោកព្យាយាមបំបែកពួកយើង។ ពួកយើងបានកំពុងមើលឃើញពីផលវិបាកនៃការដឹកនាំគ្មានភាពចាស់ទុំរយៈពេល ៣ឆ្នាំ”។
អតីតឧត្តមសេនីយ៍ចូលនិវត្តន៍ខាងលើនេះបានសម្តែងការខឹង ក្រោយពេលបានឃើញព្រឹត្តិការណ៍កាលពីសប្តាហ៍មុន ដែលលោកដូណាល់ ត្រាំបានគំរាមប្រើប្រាសយោធាបង្ក្រាប ខណៈដែលបាតុកម្មទូទាំងប្រទេសបានប្រែក្លាយជាអំពើហឹង្សា និងការលួចប្លន់ក្នុងទីក្រុងមួយចំនួន។
ការបាតុកម្មទូទាំងប្រទេសភាគច្រើនធ្វើឡើងដោយសន្តិវិធី ប៉ុន្តែមានខ្លះបានក្លាយជាអំពើហឹង្សា និងមានការលួចប្លន់នៅពេលយប់។
សូមបញ្ជាក់ថា លោកដូណាល់ ត្រាំកំពុងរងការរិះគន់យ៉ាងខ្លាំង ជុំវិញការគំរាមប្រើប្រាស់ទ័ពដើម្បបំបែកការជួបជុំសន្តិវិធី ខណៈដែលភាពចលាចលកំពុងផ្ទុះឡើងនៅក្នុងទីក្រុងមួយចំនួនទូទាំងសហរដ្ឋអាមេរិច។
ការផ្ទុះការតវ៉ា កើតឡើងក្រោយពេលបុរសជនជាតិស្បែកខ្មៅម្នាក់បានស្លាប់ដោយសារការថប់ដង្ហើម បន្ទាប់ពីត្រូវប៉ូលីសយកជង្គង់សង្កត់ករបស់គាត់រយៈពេលជាយូរ ទោះបីជាគាត់អង្វរ និងប្រាប់ថា គាត់មិនអាចដកដង្ហើមបានឡើយ៕
