( ខេត្តបាត់ដំបង) ៖ មានករណីប្រជាពលរដ្ឋម្នាក់ បានប្រទះឃើញគ្រាប់៥៤កេះ នៅក្នុងដីចម្ការរបស់ខ្លួន នៅថ្ងៃទី០៤ ខែសីហា ឆ្នាំ២០១៩ វេលាម៉ោងប្រហែល ១១និង៥០នាទីព្រឹក ស្ថិត ក្នុងក្រុមទី០៣ ភូមិ អូរ ឃុំ ពេជ្រចិន្តា ស្រុក ភ្នំព្រឹក ខេត្តបាត់ដំបង។
ក្រោយទទួលបានព័ត៌មាននេះភ្លាម នគរបាលនៃអធិការដ្ឋាននគរបាលស្រុកភ្នំព្រឹកដឹកនាំដោយលោកវរសេនីយ៍ទោ សារ៉េត វិសេដ្ឋ បានជីកគាស់ក្នុងដីព្រៃមួយកន្លែងក្បែរអូរព្រំដែនក្នុងចំណុច 39TV 163635ស្ថិត ក្នុងក្រុមទី០៣ ភូមិ អូរ ឃុំ ពេជ្រចិន្តា ស្រុក ភ្នំព្រឹក ខេត្តបាត់ដំបង គ្រាដែលប្រជាពលរដ្ឋកាប់គាស់ដីធ្វើចំការបានប្រទះឃើញកេសដែកដែលសង្ស័យថាជាកេសគ្រាប់កាំភ្លើង។
ក្នុងសកម្មភាពគាស់កកាយដីនេះបានរកឃើញ យុទ្ឋភ័ណ្ឌជាសំណល់ពីសង្គ្រាមមានគ្រាប់កាំភ្លើងចំរុះចំនួន ៥៤កេសដែលក្នុងនោះមាន៖
គ្រាប់កាំភ្លើងប្រភេទ RPK ចំនួន ០៩កេស
គ្រាប់កាំភ្លើងប្រភេទ AK47 ចំនួន ០១កេស
គ្រាប់កាំភ្លើងប្រភេទ 12,7 ចំនួន ៤៤កេស
ក្រៅពីនោះមានគ្រាប់កាំភ្លើងជាច្រើនប្រភេទទៀតនៅក្នុងរណ្តៅដីជ្រៅ ដែលសមត្ថកិច្ចនគរបាលមិនអាចជីកគាស់ដោយដៃទទេ និងមិនមានលក្ខណ:បច្ចេកទេសជំនាញច្បាស់លាស់ តែនគរបាលបានដាក់ខ្សែបម្រាមហាមប៉ះពាល់ និងបានរាយការណ៍ជូនទៅអង្គភាពកម្ចាត់ម៉ីនកម្ពុជា CMAC ដើម្បីបន្តរុករកតាមជំនាញ ។
លោកវរសេនីយ៍ទោ សារ៉េត វិសេដ្ឋ អធិការនគរបាលស្រុកភ្នំព្រឹក បានបញ្ជាក់ថា យុទ្ឋភ័ណ្ឌទាំង៥៤កេសនេះ ស្ថិតនៅក្នុងដីយូរហើយ ដែលទំនងក្នុងអំឡុងពេលនៃសម័យសង្គ្រាមបង្ហូរឈាមពីអតីតកាល ហើយទីតាំងនេះស្ថិតនៅកៀកបំផុតពីខ្សែបន្ទាត់ព្រំដែនកម្ពុជា ថៃ ។ លោកបន្តថា តាមប្រភពពីបងប្អូន(អតីតជាទាហ៊ាន) ដែលរស់នៅទីនេះពីពេលមុនធ្លាប់បាននិយាយថា មានទីកន្លែងផ្សេងទៀតក្នុងភូមិសាស្រ្តជាប់ព្រំដែន ជាចំណុចលាក់កប់យុទ្ឋភ័ណ្ឌពីអតិតកាលហើយ រហូតមកដល់ពេលនេះ មិនអាចនៅចាំទីកន្លែងនោះដោយជាក់លាក់បានទេ ។
ទោះជាយ៉ាងណាក៏ដោយ យុទ្ឋភ័ណ្ឌជាគ្រាប់កាំភ្លើងចំរុះទាំងនេះ មានតែគ្រាប់ប្រភេទ12,7ប៉ុណ្ណោះដែល អាចនៅប្រើប្រាស់បានខ្លះ ឯគ្រាប់កាំភ្លើងផ្សេងពីនេះមានសភាពពុកផុយប្រើការលែងបានទៅហើយ៕
