ក្រោមការដឹកនាំរបស់ឯកឧត្តម ឃួង ស្រេង ជាអភិបាលរាជធានីភ្នំពេញមកដល់ពេកនេះជាង២ឆ្នាំ បានធ្វើឲ្យរាជធានីភ្នំពេញមានការអភិវឌ្ឍន៍រីកចំរើនមួយកម្រិតថែមទៀតពិសេសគឺវិស័យសាធារណការនិងការផ្តល់សេវាឲ្យនៅកៀកកិតជាមួយប្រជាពលរដ្ឋ តាមរយៈការបង្កើតឲ្យមានច្រកចេញចូល តែមួយនៅថ្នាក់រាជធានីដែលជាការគាំទ្រ និងអនុវត្តតាមយុទ្ធសាស្ត្រថ្នាក់ជាតិ ហើយការងារទាំងនេះគឺ ពិតជាទទួលបាននូវ ការកោតសរសើរ និងគាំទ្រយ៉ាងពេញទំហឹងពីសំណាក់ប្រជាពលរដ្ឋ ។
លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បញ្ជាក់ឲ្យដឹងថា ក្រោមការដឹកនាំរបស់ឯកឧត្តម ឃួង ស្រេង ជាអភិបាលរាជធានី ២ឆ្នាំមកនេះ បានកសាងនូវ សមិទ្ធិផលធំៗជាច្រើន ក្នុងនោះរួមមាន ការស្ថាបនាមហាវិថីឈ្នះឈ្នះ ចាប់ពីផ្លូវជាតិលេខ៤ ដល់ផ្លូវជាតិលេខ៦ ប្រវែងជាង២៤គីឡូម៉ែត្រ បានបញ្ចប់ ជាមួយនឹងការដាក់បង្គោលភ្លើងបំភ្លឺសាធារណៈជូនប្រជាពលរដ្ឋ ដែលធ្វើដំណើរតាមដងមហាវិថីនេះ ។ ការដំណើរការបើកការដ្ឋានសាងសង់ស្ពានបេតុងឆ្លងទន្លេសាប ការស្ថាបនារួចរាល់ស្ពានបាឡេឆ្លងទន្លេសាប ។ ការបើកការដ្ឋានស្ថាបនាស្ពានអាកាសនិងផ្លូវក្រោមដីនៅរង្វង់មូលចោមចៅ ។ ស្ថាបនាផ្លូវប្រទះឡាង ខណ្ឌដង្កោ ផ្លូវមេ ពីព្រៃស ទៅទួលពង្រ។ ការកសាងនូវស្ថានីយ៍បូមទឹកជាច្រើនកន្លែង ដូចជាស្ថានីយ៍បុរី១០០ខ្នង ស្ថានីយ៍លូ៥ ដែលស្ថានីយ៍ទាំង២កន្លែងនេះស្ថាបនាបានប្រមាណ៨០ភាគរយហើយ ។ ការកសាងស្ថានីយ៍បូមទឹកបឹងទំពុន ដែលបានបន្ថែមម៉ូទ័រ២គ្រឿង ស្ថានីយ៍បូមទឹកបឹងត្របែក ស្ថានីយ៍បូមទឹកទួលគោកទី១ ស្ថានីយ៍បូមទឹកទួលគោកទី២ ដែលស្ថានីយទាំងអស់នេះមានសមត្ថិភាពបូមទឹកខ្លាំងជាងមុនច្រើនដង រហូតទៅដល់៥ម៉ែត្រគុប ក្នុងមួយវិនាទីនិងស្មើនឹង២៨៨០០ម៉ែត្រគុប ក្នុង១ម៉ោង។
ការស្ថាបនាផ្លូវខ្សែក្រវ៉ាត់ក្រុងទី២ ដែលបាននឹងកំពុងស្ថាបនៅមិនទាន់បញ្ចប់។ ស្ពានអាកាសផ្សារដីហុយដែលបានដាក់ឲ្យដំណើរការឲ្យប្រជពលរដ្ឋបានធ្វើដំណើររាល់ថ្ងៃនេះ ។ ការស្ថាបនាបញ្ចប់ផ្លូវជាតិលេខ១ ខណ្ឌច្បារអំពៅ ។ ការកសាងរង្វង់មូលបីគួរស្រូវ នៅខណ្ឌដង្កោជាប់នឹងខេត្តកណ្តាល។
ការស្ថាបនា
ផ្លូវព្រែកថ្លឹង ចាប់ពីមហាវិថី៦០ម៉ែត្រទៅផ្លូវជាតិលេខ២ ។ការកសាងប្រឡាយស្ទឹងមានជ័យ ដែលបាននឹងកំពុងស្ថាបនាយ៉ាងមមាញឹក ដោយប្រឡាយនេះមានទំហំ៨ម៉ែត្រ ចិញ្ចើម២ម៉ែត្រ សាងសង់ផ្លូវបេតុងទទឹង៦ម៉ែត្រ លើបណ្តាយប្រឡាយប្រវែង១៣៩៨ម៉ែត្រ ដោយចាក់បេតុងបុកស៊ីផាយ ។គម្រោងនេះ បានបែងចែកជា៤តំណាក់កាល ។ ក្នុងនោះតំណាក់កាលទី១ មានប្រវែង៣២៦ម៉ែត្រ សងខាងប្រឡាយសរុបប្រវែង៦៥២ម៉ែត្រ ហើយក្នុងជំហានទី១នេះ រដ្ឋបាលរាជធានីបានសម្រេចចាប់ឆ្នោតប្រគល់ដីជូនប្រជាពលរដ្ឋដែលរស់នៅលើប្រឡាយនេះ១៥២គ្រួសាររួចហើយ កាលពីប៉ុន្មានខែមុននេះ ហើយប្រជាពលរដ្ឋដែលរស់នៅនិងរងផលប៉ះពាល់ប្រឡាយនេះទទួលបានដីទំហំ៤គុណនិង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងផងដែរ ។ ការស្ថាបនាផ្លូវនិងស្ពានឡុងឈិនភ្ជាប់ទៅផ្លូវលេខ១៥១ ក្នុងមូលដ្ឋានខណ្ឌព្រែកព្នៅ។ ការពង្រីកផ្លូវសហព័ន្ធរុស្សី ដែលមកដល់ពេលនេះសម្រេចបាន៩០ភាគរយហើយ។ការងារដាក់បង្គោលភ្លើងបំភ្លឺសាធារណៈលើបណ្តោយផ្លូវជាតិលេខ១ ចាប់ពីភូមិក្តីតាកុយរហូតដល់ព្រំប្រទល់ខេត្តកណ្តាល ។ ដាក់បង្គោលភ្លើងបំភ្លឺសាធារណៈលើបណ្តោយផ្លូវជាតិលេខ៤ ចាប់ពីរង្វង់មូលចោមចៅរហូតដល់ព្រំប្រទល់ខេត្តកណ្តាល ។ ដាក់បង្គោលភ្លើងបំភ្លឺសាធារណៈលើបណ្តោយផ្លូវជាតិលេខ៣ ចាប់ពីរង្វង់មូលចោមចៅរហូតដល់ជិតផ្លូវទួលពង្រ ។រួមជាមួយនិងការដាក់ភ្លើងស្តុបថ្មីចំនួន១១៥ទីតាំង ដែលជាជំនួយរបស់អង្គកាចៃការបស់ប្រទេសជប៉ុន។
ដោយឡែកសម្រាប់ការបំរើសេវាជូនប្រជាពលរដ្ឋវិញនៅរាជធានីភ្នំពេញ ពិតជាទទួលបានការគាំទ្រពេញចិត្តពេញថ្លើមពីសំណាក់ប្រជាពលរដ្ឋយ៉ាងខ្លាំង ដូចជាការផ្តល់ សៀវភៅស្នាក់នៅ អត្តសញ្ញាណប័ណ្ណ អត្រានុកូលដ្ឋាន និងសំបុត្រកំណើតជាដើម ហើយអ្វីដែលទទួលបានចំណាប់អាម្មណ៍ថ្មីមួយទៀតនោះ គឺការបង្កើតនិងអនុវត្តបានច្រកចេញតែមួយ ដែលបានបំរើសេវាកម្មនៅកៀកកិតជាមួយប្រជាពលរដ្ឋតែម្តង ហើយបានទទួលការគាំពីប្រជាពលរដ្ឋយ៉ាងពេញទំហឹង ។
ពាក់ព័ន្ធនិងការផ្តល់សេវាដូនប្រជាពលរដ្ឋនេះដែរ អនុវត្តតាមអនុសាសន៍ដ៏ខ្ពង់ខ្ពស់របស់ម្តេចជោហ៊ុន សែន កាលពីប៉ុន្មានថ្ងៃកន្លងមកនេះ ឯកឧត្តម ឃួង ស្រេង អភិបាលរាជធានីភ្នំពេញ ក៏បានដឹកនាំអាជ្ញាធរខណ្ឌនិងមន្ត្រីជំនាញ ចុះសំណេះសំណាល និងពិនិត្យមើលស្ថានភាពជាក់ស្តែង ដើម្បីផ្តល់ជូនបងប្អូននូវការប្រើប្រាស់ភ្លើងអគ្គិសនីក្នុងតំលៃសមរម្យ ខណៈដែលកន្លងមកនេះ បងប្អូនអាជីវករលក់ដូរតាមបណ្តាផ្សារក្នុងរាជធានីភ្នំពេញប្រើប្រាស់អគ្គិសនីពីអ្នកម៉ៅការឯកជន ដែលតូបខ្លះត្រូវបង់ក្នុងតំលៃ ១.២០០៛ ទៅ ១.
៥០០៛ ក្នុងមួយគីឡូវ៉ាត់ម៉ោង។ អនុវត្តតាមអនុសាសន៍ណែនាំដ៏ខ្ពង់ខ្ពស់នេះ រដ្ឋបាលរាជធានីភ្នំពេញ សហការជាមួយអគ្គិសនីកម្ពុជា បានរៀបចំការបញ្ចុះតម្លៃប្រើប្រាស់អគ្គិសនីតាមតូបលក់ដូររបស់អាជីវករក្នុងផ្សារទាំងអស់នៅរាជធានីភ្នំពេញ មកត្រឹម ៧៤០រៀល ក្នុងមួយគីឡូវ៉ាត់ម៉ោង ដែលជាតំលៃក្នុងប្រភេទពាណិជ្ជកម្មធុនតូច ដោយនឹងចាប់ផ្តើមពីខែមករា ឆ្នាំ២០១៩ នេះតទៅ។
