នាថ្ងៃពុធ ១២កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៩ ខែធ្នូ ឆ្នាំ២០១៨ នៅទីស្តីការក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំប្រចាំឆ្នាំរបស់គណៈកម្មាធិការដឹកនាំគម្រោងភាពជាដៃគូសម្រាប់កិច្ចអភិវឌ្ឍន៍ដោយផ្តោតលើលទ្ធផល ។ កិច្ចប្រជុំនេះ ដឹកនាំដោយ ឯកឧត្តម រ៉ិត វុទ្ធី អគ្គលេខាធិការរងគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា និងជាប្រធានគម្រោងភាពជាដៃគូសម្រាប់កិច្ចអភិវឌ្ឍន៍ដោយផ្តោតលើលទ្ធផល និងមានការចូលរួមពីតំណាងដៃគូអភិវឌ្ឍន៍ចំនួន ៥ ដែលជាសមាជិកគណៈកម្មាធិការដឹកនាំគម្រោង រួមមាន៖ UNDP, សហភាពអឺរ៉ុប, អូស្រ្តាលី, ស៊ុយអ៊ែត និងសហរដ្ឋអាមេរិក ព្រមទាំងមន្រ្តីក្រុមប្រឹក្សាអភិវឌ្ឍន៍កម្ពុជា សរុបប្រមាណ ៤០ រូប ។ គោលបំណងចម្បងនៃកិច្ចប្រជុំនេះ គឺដើម្បីពិនិត្យវឌ្ឍនភាព និងបញ្ហាប្រឈមនានាក្នុងការអនុវត្តគម្រោងសម្រាប់ឆ្នាំ២០១៨ និងអនុម័តលើផែនការសកម្មភាព និងផែនការថវិកាសម្រាប់ឆ្នាំ២០១៩ ។
គម្រោងភាពជាដៃគូសម្រាប់កិច្ចអភិវឌ្ឍន៍ដោយផ្តោតលើលទ្ធផល ត្រូវបានអនុវត្តចាប់តាំងពីឆ្នាំ២០១១ (ដំណាក់កាលទី១ ឆ្នាំ២០១១-២០១៥ និងដំណាក់កាលទី២ ឆ្នាំ២០១៦-២០២០) ។ គោលដៅចម្បងនៃគម្រោងនេះ គឺដើម្បីពង្រឹងភាពជាម្ចាស់របស់រាជរដ្ឋាភិបាល និងភាពជាដៃគូសម្រាប់កិច្ចអភិវឌ្ឍន៍ដោយផ្តោតលើលទ្ធផល តាមរយៈការគាំទ្រដល់ធាតុចេញសំខាន់ៗ ចំនួន ៣ គឺ ១) ការរៀបចំផែនការយុទ្ធសាស្រ្តអភិវឌ្ឍន៍ជាតិឆ្នាំ២០១៩-២០២៣ និងការធ្វើមូលដ្ឋានីយកម្មគោលដៅអភិវឌ្ឍន៍ ប្រកបដោយចីរភាពសម្រាប់កម្ពុជា, ២) ការកៀរគរហិរញ្ញប្បទានសហប្រតិបត្តិការ និងគ្រប់គ្រងសមាសភាគពាក់ពន្ធ័វិស័យវិនិយោគ សាធារណៈសម្រាប់គាំទ្រការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា និងការគាំទ្រដល់លេខាធិការដ្ឋានដឹកនាំ និងសម្របសម្រួលការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា, និង ៣) ការគាំទ្រដល់ការអនុវត្តយុទ្ធសាស្រ្ត ស្តីពីកិច្ចសហប្រតិបត្តិការអភិវឌ្ឍន៍ និងភាពជាដៃគូឆ្នាំ២០១៩-២០២៣ ដើម្បីធានាប្រសិទ្ធភាពហិរញ្ញប្បទានសហប្រតិបត្តិការ សម្រាប់កិច្ចអភិវឌ្ឍន៍ ។
អង្គប្រជុំបានពិភាក្សា និងវាយតម្លៃខ្ពស់ចំពោះសមិទ្ធផលនានាដែលគម្រោងសម្រេចបានកន្លងមក ពិតជាបានរួមចំណែក យ៉ាងសំខាន់ក្នុងកិច្ចអភិវឌ្ឍន៍ ក៏ដូចជាពង្រឹងភាពជាម្ចាស់ និងភាពជាដៃគូរបស់រាជរដ្ឋាភិបាលជាមួយបណ្តាដៃគូអភិវឌ្ឍន៍ទាំងអស់ សម្រាប់កិច្ចសហប្រតិបត្តិការអភិវឌ្ឍន៍ ។ ឯកឧត្តម រុិត វុទ្ធី ប្រធានអង្គប្រជុំ បានគូសបញ្ជាក់អំពីសារៈសំខាន់នៃគម្រោង និងថ្លែងអំណរគុណចំពោះដៃគូអភិវឌ្ឍន៍ ដែលបានផ្តល់ និងបន្តផ្តល់ការគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងកិច្ចអភិវឌ្ឍន៍ តាមរយៈគម្រោងភាពជាដៃគូសម្រាប់កិច្ចអភិវឌ្ឍន៍ដោយផ្តោតលើលទ្ធផល-ដំណាក់កាលទី១ និងដំណាក់កាល ទី២ នេះ ។ ទន្ទឹមនឹងនេះ តំណាងដៃគូអភិវឌ្ឍន៍ទាំង ៥ ក៏បានបេ្តជ្ញាបន្តផ្តល់ការគាំទ្រដល់គម្រោងនេះ និងសន្យាផ្តល់ហិរញ្ញប្បទាន ប្រមាណ ៧០០ ០០០ ដុលា្លរអាមេរិក សម្រាប់ឆ្នាំ២០១៩ និងឆ្នាំ២០២០ ៕
