រាជធានីភ្នំពេញ៖ ព្រះនាង Beatrice ចៅស្រីម្ចាស់ក្សត្រី អេឡីសាបេតទី២ នៃចក្រភពអង់គ្លេសយាងបំពេញទស្សនកិច្ចក្រៅផ្លូវការលើកទី១ នៅសាលារៀនជំនាន់ថ្មី (NGS) ក្នុងវិទ្យាល័យព្រះស៊ីសុវត្ថិ ដើម្បីផ្សព្វផ្សាយពីកម្មវិធីសិក្សារបស់សាលារៀនជំនាន់ថ្មី ដល់សិក្សានុសិស្សកម្ពុជា។
ការយាងបំពេញទស្សនកិច្ចនេះ ត្រូវបានធ្វើឡើងដោយមានការសម្របសម្រួល និងអមដំណើរដោយតំណាងស្ថានទូតប្រទេសអង់គ្លេស ប្រចាំព្រះរាជាណាចក្រកម្ពុជា នាថ្ងៃសុក្រ ៣រោច ខែអស្សុជ ឆ្នាំច សំរឹទ្ធិស័ក ព.ស.២៥៦២។
ការយាងបំពេញទស្សនកិច្ចនេះ ត្រូវបានធ្វើឡើង បន្ទាប់ពីព្រះនាងបានយាងបំពេញទស្សនកិច្ច នៅក្នុងសាលាបឋមសិក្សា និងអនុវិទ្យាល័យអនុវត្ត ហ៊ុន សែន កំពង់ចាម កាលពីថ្មីៗនេះ។
សូមជម្រាបថា សាលារៀនជំនាន់ថ្មី គឺជាកម្មវិធីសិក្សាថ្មីមួយ ដែលក្រសួងអប់រំ យុវជន និងកីឡា បានដាក់ឱ្យអនុវត្ត ក្នុងដំណាក់កាលសាកល្បងនាឆ្នាំ២០១៥ ដែលបច្ចុប្បន្នកំពុងអនុវត្តនៅសាលាចំនួន១០នៅកម្ពុជា។
ការអនុវត្តនេះ ធ្វើទាំងថ្នាក់បឋម និងថ្នាក់មធ្យមសិក្សា ក្នុងបំណងធ្វើឱ្យការអប់រំនៅកម្ពុជា កាន់តែល្អប្រសើរ៕
ប្រភព៖ គណបក្សប្រជាជនកម្ពុជា-Cambodian-Peoples-Party
