(ភ្នំពេញ) នៅព្រឹកថ្ងៃសៅរ៍ ១១កើត ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២០ នៃតុលា ឆ្នាំ២០១៨ អភិបាលរាជធានីភ្នំពេញ ឯកឧត្តម ឃួង ស្រេង បានដឹកនាំមន្ទីរជំនាញនិងអាជ្ញាធរខណ្ឌសែនសុខ និងខណ្ឌពោធិសែនជ័យចុះពិនិត្យដោយផ្ទាល់នៅតំបន់មុខព្រលានយន្តហោះភ្នំពេញនិងតំបន់មួយចំនួនដែលទទួលរងការលិចលង់ដោយជំនន់ទឹកភ្លៀង ។
ឯកឧត្តម ឃួង ស្រេង ពាក់ព័ន្ធនិងកិច្ចការងារនេះ បានដើរមើលប្រព័ន្ធលូតាមបណ្តាយផ្លូវរុស្សី ចាប់ពីផ្លូវ២០១១ ដល់ដងន័ង្គល និងបន្តទៅមើលប្រឡាយទួលសំពៅស្ថិតក្នុងតបន់ភូមិសាស្ត្រ ភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ដើម្បីដោះស្រាយបញ្ហាទឹកលិចក្នុងភូមិសាស្ត្រដងន័ង្គលមុខព្រលានយន្តហោះអន្តរជាតិភ្នំពេញ ភូមិព្រៃទា សង្កាត់ចោមចៅទី៣ ភូមិក្បាលដំរី២ ភូមិត្រពាំងជ្រៃ ភូមិចំការឪឡឹក សង្កាត់កាកាបទី២ ខណ្ឌពោធិ៍សែនជ័យ និងភូមិដំណាក់ សង្កាត់គោកឃ្លាង ខណ្ឌសែនសុខ កុំអោយរងការលិចផ្លូវ លំនៅដ្ឋានរបស់បងប្អូនប្រជាពលរដ្ឋ ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ បានដឹកនាំមន្ទីរជំនាញ និងមន្ត្រីរដ្ឋបាលរាជធានីភ្នំពេញ ចុះពិនិត្យជាក់ស្តែង និងដាក់គ្រឿងចក្រចុះកាយមុខទឹក និងបានអោយស្តារប្រឡាយស្ថិតក្នុងតំបន់ភូមិសាស្ត្រខាងលើ ដើម្បីសម្រួលចរន្តទឹកហូរបានលឿនទាន់ពេលវេលា និង សម្រួលដល់ការធ្វើដំណើររបស់ប្រជាពលរដ្ឋតំបន់នោះ ជៀសផុតពីការលិចលង់។
សូមបញ្ជាក់ផងដែរថា ប្រឡាយទួលសំពៅមានតូនាទីយ៉ាងសំខាន់ក្នុងការរំដោះទឹកចេញពី ផ្លូវសហព័ន្ធរុស្ស៊ី សង្កាត់ចោមចៅទី១ ទី២ ទី៣ ខណ្ឌពោធិ សែនជ័យ និងតំបន់មួយចំនួននៅក្នុងខណ្ឌសែន សុខ ដូចជាភូមិដំណាក់ សង្កាត់គោកឃ្លាង ភូមិក្រាំងអង្ក្រង សង្កាត់ក្រាំងធ្នង់ជាដើម។ ជាទិសដៅចំពោះមុខ មន្ទីរសាធារណការនិងដឹកជញ្ជូនរាជធានីភ្នំពេញនឹងដាក់លូទំហំមួយម៉ែត្រកន្លះ២ខ្សែនៅប្រឡាយទួលសំពៅ ក្នុងភូមិក្រាំងអង្ក្រង សង្កាត់ក្រាំង រួមនិងការកែសម្រួលតភ្ជាប់លូប្រឡាយ នៅតំបន់នេះអោយកាន់តែល្អ ប្រសើរជាងមុន។
ជាងនេះទៅទៀត ជាគម្រោងនៅក្នុងឆ្នាំ២០១៩ ខាងមុខនេះយើងក៏នឹងសាងសង់ស្ថានីយ ទួលសំពៅមួយថ្មីបន្ថែមទៀតផងដែរ ដែលមានសមត្ថភាពបូមទឹកបាន១២ម៉ែត្រគុប ក្នុងមួយនាទី ជាមួយនឹងការបំពាក់ម៉ូទ័របូមទឹកចំនួន៤គ្រឿង៕
