ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងពិធីសម្ពោធអគារអន្ទ្រទេវី របស់រាជបណ្ឌិតសភា នាព្រឹកថ្ងៃព្រហស្បតិ៍នេះ បានរំលឹកឲ្យមានការណែនាំដល់សភាពាណិជ្ជកម្មកម្ពុជាឲ្យសម្លឹងមើលទីផ្សារអង្ករបន្ថែមទៀត ខណៈសម្តេចបានណែនាំនៅក្នុងជំនួបមួយកាលពីពេលថ្មីៗនេះទៅកាន់អនុប្រធានាធិបតីប្រទេសប៉ាឡាវ ឲ្យប្រទេសនេះ ទិញអង្ករពីកម្ពុជា ជាជាងទិញពីអាមរិក ដែលមានតម្លៃថ្លៃ និងចំងាយផ្លូវដឹកជញ្ជូនឆ្ងាយ។
ជុំវិញបញ្ហាអង្ករនេះដែរ សម្តេចក៏បានថ្លែងជាថ្មីម្តងទៀតដោយមិនមានការព្រួយបារម្ភថា អង្ករកម្ពុជានៅតែអាចឈានជើងចូលសហភាពអឺរ៉ុបចំនួន២៣ប្រទេសដដែលដូចកាលពីមុន ក្នុងចំណោម២៨ប្រទេស។ និយាយដល់ភាពអនុគ្រោះពន្ធពីសហភាពអឺរ៉ុប(EBA)ដល់កម្ពុជា សម្តេចហ៊ុន សែន នៅតែអះអាងបែបធម្មតាថា ការបាត់ទីផ្សារនិងបាត់EBA មានលក្ខណៈខុសគ្នា តែសម្តេចថាកម្ពុជាចៀសបង់ពន្ធមិនរួចទេ នៅឆ្នាំ២០២៥ ឬ២០២៦ ខាងមុខ នៅពេលសេដ្ឋកិច្ចកម្ពុជាមានការរីកចំរើន នោះនឹងអស់EBA៕
