(សីហនុ) ប្រជាពលរដ្ឋចំនួន៤២គ្រួសារ ដែលមានទំនាស់ដីធ្លីជាមួយ លោក ចាន់ កាំង បានមកចាប់ឆ្នោតយកលេខសំគាល់ក្បាលដី បន្ទាប់ពីមានការផ្សះផ្សារដោយទទួលបានជោគជ័យ ពីឯកឧត្តមអភិបាលខេត្តព្រះសីហនុ ។ ការចាប់ឆ្នោតនេះត្រូវបានធ្វើឡើងនៅរសៀលថ្ងៃទី១៦ ខែសីហា ឆ្នាំ២០១៨ ក្រោមអធិបតីភាព ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ និងអាជ្ញាធរក្រុង សង្កាត់ ភូមិ ថ្នាក់ដឹកនាំមន្ទីរដែនដីខេត្ត និងភាគីទំនាស់ផងដែរ ។
ឯកឧត្តម យន្ត មីន បានបញ្ជាក់ថា ចាប់ពីពេលនេះតទៅ ទំនាស់នេះត្រូវបានបញ្ចប់ជាស្ថាពរហើយ ដែលបានអូសបន្លាយតាំងពីឆ្នាំ ២០១២ មកម្លេះ ។ ឯកឧត្តម ស្នើអោយប្រធានមន្ទីរដែនដីសម្រួលធ្វើប័ណ្ណជូនពលរដ្ឋស្របតាមច្បាប់។ ឯកឧត្តម ក៏បានថ្លែងអំណរគុណភាគីទំនាស់ដែលបានយល់ព្រមបញ្ចប់វិវាទនេះ ដោយឈរលើគោលការណ៏ឈ្នះ ក្រោមកិច្ចសម្របសម្រួលរបស់រដ្ឋបាលខេត្តព្រះសីហនុ៕
