(ភ្នំពេញ) នេះជាដំណឹងល្អសម្រាប់កសិករខ្មែរ ដោយសារ ភាគីចិន បានយល់ព្រមនាំចេកអំបូងលឿង ទៅកាន់ទីផ្សារ ឲ្យបាន៣០ម៉ឺនតោន ក្នុងមួយឆ្នាំ ។
កាលពីល្ងាចថ្ងៃទី២ សីហា ឆ្នាំ ២០១៨ម្សិលមិញនេះ ឯកឧត្តម រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម ឯកអគ្គរដ្ឋទូតប្រជាមានិតចិនប្រចាំនៅកម្ពុជាពិធីចុះហត្ថលេខាលើពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេកអំបូងលឿងពីកម្ពុជាទៅកាន់ប្រទេសចិន ហើយកិច្ចព្រមព្រៀងនោះក្រោមអធិបតីភាពឯកឧត្តម ហោ ណាំ ហុង ឧបនាយករដ្ឋមន្ត្រី និងជាតំណាងដ៏ខ្ពង់ខ្ពស់សម្តេចតេជោហ៊ុន សែន នាយករដ្ឋមន្ត្រី។
ឯកឧត្តម វេង សាខុន បានថ្លែងថា ដោយផ្អែកលើអនុស្សរណៈនៃការយោគយល់គ្នាស្តីពីការពង្រឹងកិច្ចសហប្រតិបត្តិការលើវិស័យកសិកម្ម រវាងក្រសួងកសិកម្ម រុក្ខាប្រមាញ់ និងនេសាទ ជាមួយក្រសួងកសិកម្មនៃសាធារណរដ្ឋប្រជាមានិតចិន នាថ្ងៃទី១៨ ខែមីនា ឆ្នាំ២០១០ និងអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការអនាម័យ និងភូតគាមអនាម័យ រវាងក្រសួងកសិកម្ម រុក្ខាប្រមាញ់ និងនេសាទ ជាមួយនឹងអគ្គរដ្ឋបាលត្រួតពិនិត្យគុណភាព អធិការកិច្ច និងចត្តាឡឺស័ក នៃសាធារណរដ្ឋប្រជាមានិតចិន នាថ្ងៃទី២២ ខែតុលា ឆ្នាំ២០១០ ។
ឯកឧត្តម បន្ថែមទៀតថា ក្រសួងកសិកម្ម រុក្ខាប្រមាញ់ និងនេសាទ បានខិតខំអនុវត្តយ៉ាងខ្ជាប់ខ្ជួន ក្នុងការចរចាជាមួយភាគីចិន ដើម្បីជំរុញឱ្យផលិតផលកសិកម្មបាននាំចូលទៅកាន់ទីផ្សារចិន។សម្រាប់ អគ្គនាយកនៃអគ្គនាយកដ្ឋានកសិកម្ម ឯកឧត្តមបណ្ឌិត ហ៊ាន វណ្ណហន បានថ្លែងថា កិច្ចព្រមព្រៀងនេះ បង្ហាញពីជោគជ័យមួយទៀតរបស់រាជរដ្ឋាភិបាលកម្ពុជា និងភាគីចិន ហើយចេកដែលនាំចេញនេះ គឺ សំដៅលើចេកអំបូងលឿង ដែលខុសពីចេកធម្មតា និងទុកបានយូរ ក្នុងមួយឆ្នាំនឹងនាំចេញឲ្យបាន៣០ម៉ឺនតោន ទៅទីផ្សារចិនផងដែរ។
ចំណែកភាគីកម្ពុជា បាននិងកំពុងបន្តស្នើសុំទៅភាគីចិនឲ្យពិនិត្យលទ្ធភាពនិងពន្លឿនការងារបន្ថែម ក្នុងការនាំចូលនូវផលិតផលកសិកម្មចាំបាច់មួយចំនួនទៀតទៅកាន់ទីផ្សារចិន ដូចជា ផ្លែស្វាយ ផ្លែមៀន (តាង៉ែន) ផ្លែស្រកានាគ ម្រេច និងសំបុកទឹកមាត់ត្រចៀកកាំ សម្រាប់ធ្វើការនាំចេញទៅប្រទេសចិនជាបន្តទៀត។
យោងតាម រាជរដ្ឋាភិបាលកម្ពុជា ដែលមានក្រសួងកសិកម្ម រុក្ខាប្រមាញ់ និងនេសាទ កំពុងជំរុញចេកប្រភេទនាំចេញនេះអាចផ្តល់ផល ពី៦០ ទៅ ៧៣តោន ក្នុង១ ហិកតា ក្នុង១ឆ្នាំ (ប្រមូលផល ៣ដង ក្នុង២ឆ្នាំ) ។
ផលិតផលកសិកម្មកម្ពុជា បាននាំចេញទៅកាន់ប្រទេសចិន នាឆ្នាំ២០១៧ មានអង្ករមានចំនួនជិត ២០០ ពាន់តោន ផលិតផលដំឡូងមីក្រៀម និងម្សៅសរុបចំនួនជាង ៥៨ពាន់តោន កៅស៊ូមានចំនួន ៣.៣៤០តោន ស្ករអំពៅមានចំនួន ១៤.៩៤០តោន និងផលិតផលកសិកម្មមួយចំនួនទៀត៕