សមាជិកព្រឹទ្ធសភាសហរដ្ឋអាមេរិក ចំនួន០៤នាក់ និងសមាជិកព្រឹទ្ធសភាសហគមន៍អឺរ៉ុប ចំនួន៣០នាក់ នឹងមកសង្កេតការណ៍បោះឆ្នោតជ្រើសតាំងតំណាងរាស្ត្រនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។ នេះបើតាមការបញ្ជាក់របស់ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) នៅក្នុងសន្និសីទសារព័ត៌មាននារសៀលថ្ងៃទី២៧ ខែកក្កដា ឆ្នាំ២០១៨ នៅសាលសន្និសីទ គ.ជ.ប។
ឯកឧត្តមបានឱ្យដឹងថា សមាជិកព្រឹទ្ធសភាសហរដ្ឋអាមេរិក ទាំង០៤រូប នឹងមកដល់កម្ពុជានៅថ្ងៃទី២៨ ខែកក្កដា រួមមាន៖ លោក Doug Ericksen សមាជិកព្រឹទ្ធសភានៃរដ្ឋ Washington State, លោក Vincent Buys, លោក Brandon Vick និងលោក Drew MacCewen ដែលអ្នកទាំង៣ គឺជាសមាជិកសភាតំណាងរាស្ត្រនៃរដ្ឋ Washington State។
ឯកឧត្តម ហង្ស ពុទ្ធា លើកឡើងថា ព្រឹទ្ធសមាជិក Doug Ericksen និងសមាជិកសភាអាមេរិកមួយចំនួន ធ្លាប់បានអញ្ជើញមកកម្ពុជាកាលពីខែឧសភា ឆ្នាំ២០១៨ ក្នុងដំណើរទស្សនកិច្ចបង្កើនមិត្តភាពនិងពាណិជ្ជកម្មរវាងប្រទេសកម្ពុជា និងរដ្ឋវ៉ាស៊ីងតោន។ ក្នុងដំណើរទស្សនកិច្ចនោះ លោក Doug Ericksen បានថ្លែងថា លោកចង់ឃើញទំនាក់ទំនងកិច្ចសហប្រតិបត្តិការសេដ្ឋកិច្ច រវាងកម្ពុជានិងសហរដ្ឋអាមេរិក ត្រូវបានពង្រឹង និងចំណងទំនាក់ទំនងមិត្តភាពរវាងប្រទេសទាំង២ កាន់តែខ្លាំងក្លា។
មន្រ្តី គ.ជ.ប រូបនេះបានបន្ថែមថា ក្រៅពីសមាជិកព្រឹទ្ធសភាសហគមន៍អឺរ៉ុប ចំនួន៣០នាក់ ក៏មានក្រុមប្រឹក្សាអឺរ៉ុបដើម្បីទេសចរណ៍ ពាណិជ្ជកម្ម ចំនួន ០៩នាក់ និងក្រុមប្រឹក្សាអឺរ៉ុបសម្រាប់ការទំនាក់ទំនងអន្តរជាតិ ចំនួន ០៥នាក់ទៀត នឹងមកចូលរួមសង្កេតការណ៍បោះឆ្នោតនៅកម្ពុជាផងដែរ។
ឯកឧត្តមបានបញ្ជាក់ទៀតថា ភ្ញៀវដែលនឹងអញ្ជើញមកចូលរួមទាំងនោះ គឺតាមរយៈសេចក្តីស្នើសុំ របស់ក្រសួងការបរទេសកម្ពុជា៕
