(ភ្នំពេញ) ថ្ងៃទី០២ ខែកក្កដា ឆ្នាំ២០១៨ -ស្ពានអាកាសមិត្តភាពកម្ពុជា-ចិន សែនសុខ (ស្ពានអាកាសផ្សារដីហុយ) ដែលបានដាក់ឱ្យប្រជាពលរដ្ឋប្រើប្រាស់ជាបណ្ឌោះអាសន្នតាំងពីមុនថ្ងៃបុណ្យចូលឆ្នាំថ្មីប្រពៃណីជាតិខ្មែរកន្លងមកនោះ ត្រូវបានសម្ពោធដាក់ឱ្យប្រើប្រាស់ជាផ្លូវការ នាព្រឹកថ្ងៃចន្ទ ៥រោច ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវ នឹងថ្ងៃទី ២ ខែកក្កដា ឆ្នាំ២០១៨ ក្រោមអធិបតីភាពដ៏ខ្ពង់ ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ឯកឧត្ដម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា គម្រោងសាងសង់ស្ពានអាកាសមិត្តភាពកម្ពុជា-ចិន សែនសុខ មានប្រវែងសរុប ៩៤២ម៉ែត្រ ទទឹង ១៦,៥ម៉ែត្រ ក្នុងនោះតួស្ពាន មានប្រវែង ៦១០ម៉ែត្រ និងផ្លូវតភ្ជាប់ក្បាលស្ពានសងខាង ប្រវែងសរុប ៣៣២ម៉ែត្រ ដោយក្រាលបេតុងកៅស៊ូ (AC) កម្រាស់ ១០សង់ទីម៉ែត្រ។ គម្រោងនេះចំណាយថវិកាសរុបប្រមាណ ១៧លានដុល្លារអាម៉េរិក ជាហិរញ្ញប្បទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ពន្ធ និងអាករផ្សេងៗ។ ស្ពាននេះបានប្រើពេលសាងសង់ ២៤ខែ ចាប់ពីខែឧសភា ឆ្នាំ២០១៦ ហើយបញ្ចប់ការសាងសង់នៅខែឧសភា ឆ្នាំ២០១៨កន្លងទៅនេះ។
ឯកឧត្ដមបានឱ្យដឹងដែរថា ស្ពានអាកាសមិត្តភាពកម្ពុជា-ចិន សែនសុខ គឺជាផ្នែកមួយនៃគម្រោងសាងសង់ផ្លូវក្រវាត់ក្រុងខ្សែទី២ កំណាត់ទី២ ដែលគម្រោងទាំងមូលមានប្រវែងសរុប ១៦,៦៧៩គីឡូម៉ែត្រ មានចំណុចចាប់ផ្តើមពីមហាវិថីសហព័ន្ធរុស្សីនៅត្រង់ភ្លើងស្តុបរតនាផ្លាហ្សា ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ដោយរត់កាត់តាមបណ្តោយផ្លូវណ័ដប្រ៊ីឌ (Northbridge) ផ្លូវទ្រុងមាន់ ផ្លូវភូមិទួលពង្រ ផ្លូវទំនប់៧មករា មហាវិថីសម្តេចអគ្គមហាសេនាបតីតេជោ ហ៊ុន សែន (ផ្លូវ៦០ម៉ែត្រ) និងតភ្ជាប់ទៅនឹងផ្លូវជាតិលេខ២ ត្រង់គីឡូម៉ែត្រលេខ ១៤+៤១៧ ចំណុចគល់ស្ពានព្រែកហូរ(ផ្នែកខាងជើង) ស្ថិតនៅត្រង់ភូមិតាក្តុល សង្កាត់តាក្តុល ក្រុងតាខ្មៅ ខេត្តកណ្តាល និងតភ្ជាប់ទៅផ្លូវលេខ ១១៥ និងស្ពានតាខ្មៅ ខេត្តកណ្តាល។ ស្ពានអាកាសដ៏ថ្មីស្រឡាងនេះ នឹងរួមចំណែកជួយបង្កើនប្រសិទ្ធភាពនៃការធ្វើដំណើរ និង ដឹកជញ្ជូនរបស់ប្រជាពលរដ្ឋរស់នៅរាជធានីភ្នំពេញ និងប្រជាពលរដ្ឋដែលធ្វើដំណើរឆ្លងកាត់ ជាពិសេសជួយសម្រួលដល់អ្នកដំណើរទៅ-មកអាកាសយានដ្ឋានអន្តរជាតិភ្នំពេញ ឱ្យបានកាន់ តែងាយស្រួលឆាប់រហ័សទាន់ពេលវេលា និងប្រកបដោយសុវត្ថិភាព។
គួរញ្ជាក់ដែរថា មកដល់បច្ចុប្បន្ននេះនៅក្នុងរាជធានីភ្នំពេញ មានស្ពានអាកាសចំនួន ៦ កន្លែងហើយ ដែលក្នុងនោះមានទី១ ស្ពានអាកាសក្បាលថ្នល់ នៅអតីតរង្វង់មូលក្បាលថ្នល់ ទី២ស្ពានអាកាស៧មករា ស្ថិតនៅស្តុបពេទ្យលោកសង្ឃ ទី៣ស្ពានអាកាសស្ទឹងមានជ័យ ទី៤ ស្ពានអាកាស៥មករា ស្ថិតនៅស្ដុបតិចណូ ទី៥ ស្ពានអាកាសមិត្តភាពកម្ពុជា-ចិន សែនសុខ នៅស្តុបផ្សារដីហុយ និងទី៦ ស្ពានអាកាស និងផ្លូវក្រោមដីត្រង់ចំណុចចោមចៅ ដែលបានការដ្ឋានស្ថាបនាកាលពីចុងសប្ដាហ៍កន្លមកនេះ៕
