តាំងពីសម័យបុរាណ និងមកដល់បច្ចុប្បន្នការរៀបចំមង្គលការកូនប្រុស-កូនស្រីដោយមានអាចារ្យ ភ្លេងខ្មែរ
ហែរជំនូន និងពិធីផ្សេងៗទៀតជាច្រើនក្នុងរយៈពេល១យប់២ថ្ងៃ ឬ២យប់៣ថ្ងៃ ដែលលោកមេបាបានរៀបចំឲ្យកូនចៅ គឺធ្វើទៅតាមប្រពៃណីទំនៀមទម្លាប់ខ្មែរតាំងពីដើមរៀងមក ប៉ុន្តែមិនមែនមានន័យថាក្លាយជាប្តីប្រពន្ធពិតប្រាកដនៅឡើយទេ។ ចង់ក្លាយជាប្តីប្រពន្ធស្របច្បាប់លុះត្រាតែអ្នកទាំងពីរបានទៅចុះសំបុត្រអាពាហ៍ពិពាហ៍អនុលោមទៅតាមច្បាប់ក្រមរដ្ឋបវេណីនៃព្រះរាជាណាចក្រកម្ពុជា។ ហើយការចុះសំបុត្រនោះមានអត្ថប្រយោជន៍អ្វីដល់ប្តីប្រពន្ធគ្រប់រូប។
បើយោងតាមសេចក្តីណែនាំរបស់អគ្គនាយកដ្ឋានអត្តសញ្ញាណកម្ម ការប្រើប្រាស់
សំបុត្រអាពាហ៍ពិពាហ៍គឺមានអត្ថប្រយោជន៍១២យ៉ាងដែលមានខាងក្រោម៖
១/ ជាប្ដីប្រពន្ធស្របតាមផ្លូវច្បាប់ដែលមិនអាចរំលាយទៅវិញបានតាមទំនើងចិត្តរបស់ខ្លួនឡើយ
២/ ទ្រព្យសម្បត្តិរួមក្រោយអាពាហ៍ពិពាហ៍ ត្រូវចែកគ្នាស្នើ នៅពេលលែងលះ
៣/ កាន់តែមានសុភមង្គល និងជឿទុកចិត្តគ្នា ពេលមានសំបុត្រអាពាហ៍ពិពាហ៍
៤/ ទទួលមរតកស្របច្បាប់
៥/ ចុះសំបុត្រកំណើត ឬបញ្ជាក់សំបុត្រកំណើតកូន
៦/ ធ្វើប្លង់ដី/ផ្ទះ
៧/ ធ្វើសៀវភៅស្នាក់នៅ សៀវភៅគ្រួសារ
៨/ ការពារប្រឆាំង នឹងទ្វេពន្ធភាព (ការពារប្រឆាំងការមានប្ដីច្រើន ឬមានប្រពន្ធច្រើន)
៩/ ជួយការពារទ្រព្យសម្បត្តិរួមរបស់ប្ដី/ប្រពន្ធ
១០/ ទទួលអាហារកិច្ចពេលឪពុក ម្ដាយ លែងលះគ្នា
១១/ គ្មានអំពើហិង្សាចំពោះកូន
១២/ ការគាំទ្រដល់កូន ។
ប្រភព៖ ជីវិត និងសង្គម
សម្រួលដោយ៖ NCN Daily
