កណ្តាល ៖ ហេតុការណ៍នេះបានកើតឡើងកាលពីវេលាម៉ោង០២និង៥០នាទីរសៀល ថ្ងៃទី៣១ ខែឧសភា ឆ្នាំ២០២០ ស្ថិតនៅភូមិលេខ៥ សង្កាត់ស្វាយរលំ ក្រុងតាខ្មៅ ។
ជនសង្ស័យ០៥នាក់ទី១-ឈ្មោះ សុថា សុរ៉ា ភេទប្រុស អាយុ៣២ឆ្នាំ ជនជាតិខ្មែរ ទីលំនៅភូមិចន្លក់ ឃុំគគី ស្រុកកៀនស្វាយ ខេត្តកណ្តាល មុខរបរលក់ដូរ(ឃាត់ខ្លួន), ទី២-ឈ្មោះ ភាស់ ភា ភេទប្រុស អាយុ២៥ឆ្នាំ ទីលំនៅភូមិលេខ៥ សង្កាត់ស្វាយរលំ ក្រុងតាខ្មៅ ខេត្តកណ្តាល មុខរបរកសិករ(គេចខ្លួន), ទី៣-ឈ្មោះ ភាស់ វណ្ណៈ ភេទប្រុស អាយុ២៩ឆ្នាំ ទីលំនៅភូមិលេខ៥ សង្កាត់ស្វាយរលំ ក្រុងតាខ្មៅ ខេត្តកណ្តាល មុខរបរកសិករ(គេចខ្លួន), ទី៤-ឈ្មោះ ហួន តារ៉ា ភេទប្រុស អាយុ២៦ឆ្នាំ ទីលំនៅភូមិលេខ៥ សង្កាត់ស្វាយរលំ ក្រុងតាខ្មៅ ខេត្តកណ្តាល មុខរបរកសិករ(គេចខ្លួន) និងទី៥-ឈ្មោះ ផៃ ភាស់ ភេទប្រុស អាយុ៤៨ឆ្នាំ ទីលំនៅ ភូមិលេខ៥ សង្កាត់ស្វាយរលំ ក្រុងតាខ្មៅ ខេត្តកណ្តាល មុខរបរកសិករ(គេចខ្លួន) ។
ជនរងគ្រោះ០៣នាក់មានទី១-ឈ្មោះ ឆិល ចាន់ថុល ភេទប្រុស អាយុ៣៧ឆ្នាំ ជនជាតិខ្មែរ ទីលំនៅភូមិតាក្តុល សង្កាត់តាក្តុល ក្រុងតាខ្មៅ ខេត្តកណ្តាល មុខរបរកសិករ (របួសមាត់ខាងស្តាំ), ទី២-ឈ្មោះ ឆិល មករា ភេទប្រុស អាយុ៣២ឆ្នាំទីលំនៅភូមិលេខ៣ សង្កាត់ស្វាយរលំ ក្រុងតាខ្មៅ ខេត្តកណ្តាល មុខរបរបុគ្គលិកក្រុមហ៊ុន(របួសត្រង់ក) និងទី៣-ឈ្មោះ គង់ លីដា ភេទស្រី អាយុ២៨ឆ្នាំ មានទីលំនៅ ភូមិលេខ៥ សង្កាត់ស្វាយរលំ ក្រុងតាខ្មៅ ខេត្តកណ្តាល មុខរបរលក់ដូរ(របួសមាត់ខាងស្តាំ)។
តាមប្រភពពីសមត្ថកិច្ចខេត្តកណ្តាលបានឱ្យដឹងថា មុនពេលកើតហេតុក្រុមជនសង្ស័យទាំង០៥នាក់បាននាំគ្នាអង្គុយផឹកទឹកត្នោតជូរនៅលើគ្រែមុខផ្ទះរបស់ឈ្មោះ ភាស់ វណ្ណៈ ដោយមានចាក់ធុងបាស និងវាយធុងទះដៃហ៊ោកញ្ជ្រៀវធ្វើឲ្យរំខានដល់អ្នកជិតខាង ។ បន្ទាប់មកឈ្មោះ ឆិល ចាន់ធឿន បានចេញពីផ្ទះរបស់ខ្លួនទៅប្រាប់ក្រុមជនសង្ស័យកុំឲ្យហ៊ោកញ្ជ្រៀវខ្លាំងពេក តែក្រុមជនសង្ស័យមិនស្តាប់ទេ ក្រោយមកជនរងគ្រោះឈ្មោះ ឆិល ចាន់ថុល បានដើរចេញពីផ្ទះបំណងទៅកន្លែងដែលខ្លួនធ្វើរបងថ្មឲ្យគេ ស្រាប់តែជនសង្ស័យឈ្មោះ ភាស់ ភា បានស្ទុះហក់ទៅវាយ១ដៃចំមាត់ ចំណែកបក្ខពួក៤នាក់ទៀត ក៏បានព្រួតវាយបន្ថែមទៀត ។
ឃើញគេព្រួតវាយបងរបស់ខ្លួនជនរងគ្រោះឈ្មោះ ឆិល មករា ជាប្អូនបានទៅជួយឃាត់តែត្រូវក្រុមជនសង្ស័យវាយឲ្យរងរបួសដែរ ពេលឃើញក្រុមជនសង្ស័យព្រួតវាយទៅលើជនរងគ្រោះបែបនេះជនរងគ្រោះឈ្មោះគង់ លីដា បានឈរមើលពីលើផ្ទះរបស់ខ្លួននៅក្បែរនោះ និងបានថតសកម្មភាពវាយតប់គ្នាភ្លាមនោះ ស្រាប់តែជនសង្ស័យឈ្មោះ ភាស់ ភា បានយកដុំឥដ្ឋប្រហោងគប់បណ្តាលឲ្យត្រូវចំមាត់រយះហូរឈាម ។
ក្រោយទទួលបានព័ត៌មានកម្លាំងនគរបាលប៉ុស្តិ៍រដ្ឋបាលស្វាយរលំបានចុះអន្តរាគមន៍ឃាត់ខ្លួនជនសង្ស័យបានម្នាក់ឈ្មោះ សុថា សុរ៉ា បញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីបន្តចាត់ការតាមនីតិវិធី ចំណែកបក្ខពួកជនសង្ស័យ០៤នាក់ទៀតបានរត់គេចខ្លួន ។ ករណីនេះ សមត្ថកិច្ចកំពុងបន្តចាត់ការតាមនីតិវិធី ៕
