ខ្សែបម្រើប្រេស៊ីល Paulinho បានវិលត្រលប់ទៅចុះចូលជាមួយក្លិប Guangzhou Evergrande របស់ចិនវិញ បន្ទាប់ពីគាត់ផ្លាស់ទៅជ្រកកោននៅក្រុមអ្នកមានបុណ្យ Barcelona បានមួយរដូវកាល ខណៈដែលដំណើរនៃការវិលត្រលប់របស់កីឡាករវ័យ ២៩ ឆ្នាំរូបនេះទៅកាន់លីករបស់ចិនវិញគឺត្រូវបានប្រកាសនាថ្ងៃអាទិត្យដោយក្លិប Guangzhou ។
Paulinho ត្រូវបាន Barcelona ទិញពីក្រុម Guangzhou ក្នុងតម្លៃ ៤០ លានអឺរ៉ូកាលពីរដូវក្ដៅឆ្នាំទៅ និងរកគ្រាប់បាល់បញ្ចូលទីបាន ៩ គ្រាប់ឲ្យក្រុមនៃលីកកំពូលរបស់អេស្ប៉ាញមួយនេះនៃការប្រកួតក្នុងលីក ខណៈដែល Barcelona បានលើកពាន La Liga ។ ហើយបើយោងតាមប្រភពពីអេស្ប៉ាញបានបង្ហើបឲ្យដឹងថា Paulinho ទទួលបានចំណូលស្ទើរតែទ្វេរជាពីរទៅលើចំណូលរបស់គាត់ ដោយកើនពី ៨.៥ លានអឺរ៉ូក្នុងមួយឆ្នាំទៅកាន់ ១៥ លានអឺរ៉ូក្នុងមួយឆ្នាំ។
យ៉ាងណាមិញការផ្ទេររបស់ Paulinho ទៅក្លិបចិនវិញគឺស្ថិតក្នុងកុងត្រាខ្ចីជើងពី Barcelona ប៉ុណ្ណោះ ពុំមានជាការផ្ទេរជាអចិន្ដ្រៃយ៍ឡើយ។ “កម្រិតនៃក្របខ័ណ្ឌបាល់ទាត់របស់ចិនបានរីកចម្រើនពីមួយឆ្នាំទៅមួយឆ្នាំ។” Paulinho បាននិយាយ។ “ហើយបន្ទាប់ពីការហ្វឹកហាត់នៅ Guangzhou Evergrande និង Barcelona និងការហ្វឹកហាត់ជាមួយក្រុមជម្រើសជាតិប្រេស៊ីលនៅឯព្រឹត្តិការណ៍ World Cup បានធ្វើឲ្យខ្ញុំទទួលបាននូវបទពិសោធន៍ដ៏ល្អ។ ខ្ញុំបានសម្រេចចិត្តត្រលប់ទៅលេងនៅលីករបស់ចិនវិញនាពេលនេះដោយសង្ឃឹមថានឹងអាចនាំយកជ័យជម្នះកាន់តែច្រើនសម្រាប់ Guangzhou និងអ្នកគាំទ្ររបស់ពួកគេ។ ហើយខ្ញុំក៏សង្ឃឹមផងដែរថានឹងអាចនាំយកភាពរំភើបរីករាយសម្រាប់ក្របខ័ណ្ឌកំពូលរបស់ចិនកាន់តែច្រើន។”
ប្រែសម្រួល ៖ ភក្ដី
