អតីតប្រធានក្រុមជម្រើសជាតិអង់គ្លេស លោក Terry Butcher និយាយថាគាត់មានអារម្មណ៍ថាការប្រកួតបាល់ទាត់គឺគ្មានក្ដីស្រលាញ់ចំពោះគាត់ទាល់តែសោះ មុនពេលដែលគាត់ត្រូវបានតែងតាំងជាគ្រូបង្វឹករបស់ក្រុមជម្រើសជាតិហ្វីលីពីន។ បុរសវ័យ ៥៩ ឆ្នាំរូបនេះបាននៅក្រៅរង្វង់នៃតំណែងអ្នកចាត់ការ ចាប់តាំងពីគាត់ត្រូវបានបណ្ដេញចេញដោយក្រុម Newport County កាលពីឆ្នាំ ២០១៥ ។ ហើយលោក Butcher ដែលធ្លាប់បានបង្ហាញខ្លួន ៧៧ ប្រកួតជាមួយជម្រើសជាតិអង់គ្លេសរូបនេះបានដឹកនាំក្លិបដល់ទៅ ៨ ផ្សេងគ្នា ចាប់តាំងពីរូបគាត់បានបញ្ចប់អាជីពជាកីឡាករកាលពីឆ្នាំ ១៩៩០ ។
“ការក្លាយជាគ្រូបង្វឹកនៃក្រុមជម្រើសជាតិគឺជាជំហានថ្មីមួយទៀតសម្រាប់ខ្ញុំ។” លោក Butcher បានប្រាប់ BBC Sport ។ ហើយអតីតខ្សែការពាររបស់ក្រុម Ipswich Rangers ដែលសព្វថ្ងៃកំពុងបម្រើការនៅក្នុងបុស្ដិ៍វិទ្យុ BBC រូបនេះបានថ្អូញថ្អែរថាតាំងពីគាត់ត្រូវក្រុម Newport ដេញចេញពីតំណែងមកគឺគាត់មិនទទួលបានច្រើនទេនូវឱកាសដើម្បីត្រលប់ទៅអង្គុយលើកៅអីអ្នកចាត់ការ។ “មនុស្សជាច្រើនបានចោទសួរខ្ញុំថាតើខ្ញុំមិនមានក្ដីស្រលាញ់ចំពោះការប្រកួតបាល់ទាត់ទេឬយ៉ាងណា? ប៉ុន្តែខ្ញុំកាន់តែមានអារម្មណ៍ថាបាល់ទាត់ទៅវិញទេដែលឃ្លាតឆ្ងាយក្ដីស្រលាញ់ចំពោះខ្ញុំ។”
និយាយពីក្រុមជម្រើសជាតិហ្វីលីពីនឯណោះបានឡើងទៅកាន់ការប្រកួតនៃពានរង្វាន់ AFC Asian Cup ឆ្នាំ ២០១៩ ជាលើកដំបូងរបស់ពួកគេនៅក្រោមការដឹកនាំរបស់គ្រូបង្វឹកលោក Thomas Dooley ដែលបានផុតកុងត្រាកាលពីខែមីនាកន្លងទៅ។ ហើយពួកគេនឹងត្រូវប៉ះគ្នាជាមួយក្រុមមហាអំណាចសេដ្ឋកិច្ចចិន, កូរ៉េខាងត្បូង និងកៀហ្ស៊ីស៊ីស្ថាន នាវគ្គជម្រុះក្នុងពូលនៃការប្រកួតពានរង្វាន់ខាងលើដែលនឹងចាប់ផ្ដើមការប្រកួតនាខែមករាឆ្នាំក្រោយ។
ប្រែសម្រួល ៖ ភក្ដី
