ភ្នំពេញ៖ លោក ហុក សុជីវ័ន្ដ គ្រូបង្វឹកក្រុមវិសាខា ហាក់មិនសូវសប្បាយចិត្តប៉ុន្មានទេ សម្រាប់ការរកបាន ៣ពិន្ទុពីក្រុមព្រះខ័នរាជស្វាយរៀង ជាមួយនឹងជ័យជម្នះទាំងប្រផិតប្រផើយ ៣-២ ក្នុងជំនួបសប្ដាហ៍ទី៩ នៃលីគកំពូលកម្ពុជាកាលពីល្ងាចមិញ ។ មិនតែប៉ុណ្ណោះ លោកថែមទាំងអះអាងថា បើសិនការប្រកួតសល់ម៉ោងច្រើន ឬអាជ្ញាកណ្ដាល មិនទាន់ផ្លុំកញ្ចែបញ្ចប់ការប្រកួតទេនោះ លទ្ធផលអាចនឹងបញ្ច្រាសមកវិញទៀតផង ។
សូមបញ្ជាក់ថា ការប្រកួតដ៏តានតឹងនេះ សម្រាប់ព្រះខ័នរាជស្វាយរៀង គឺបានប្រើប្រាស់កីឡាករបម្រុងច្រើន បន្ទាប់ពីរាមច្បងរបស់ពួកគេ ៧នាក់ ត្រូវបានសហព័ន្ធពិន័យព្យួរការប្រកួតជាច្រើនប្រកួត និងជាច្រើនខែ តែពួកគេនៅតែធ្វើបានល្អ បន្ទាប់ពីវិសាខានាំមុខ ៣-០ ត្រឹមដើមតង់ទី២ ពួកគេបានព្យាយាមវាយបក និងមានឱកាសស៊ុតជាច្រើនលើកច្រើនសារ តែធ្វើបានសម្រេចត្រឹមតែ ២គ្រាប់មកវិញ ។ ចំណែកលោក ហុក ជីវ័ន្ដ បានបញ្ជាក់ដែរថា ប្រកួតនេះកីឡាករមិនទាន់ពេញជើងល្អនោះទេ ព្រោះលោកត្រូវការកីឡាករខ្លះ សម្រាប់ត្រៀមការប្រកួតសប្ដាហ៍បន្ទាប់ ដោយត្រូវជួបក្រុមខ្លាំងបឹងកេត ៕
