ក្លិបយក្សរបស់អ៊ីតាលី Juventus បានចុះហត្ថលេខាទិញអ្នកចាំទី Mattia Perin ពីក្រុមនៅក្នុងលីកជាមួយគ្នា Genoa ដើម្បីយកទៅជំនួសកន្លែងអ្នកចាំទី Gianluigi Buffon ដែលបានប្រកាសចូលនិវត្តន៍ ក្រោយពីបង្ហាញខ្លួនប្រកួតចុងក្រោយរបស់ខ្លួនឲ្យក្រុមម្ចាស់ជើងឯកលីកកំពូលរបស់អ៊ីតាលីមួយនេះកាលពី ៣ សប្ដាហ៍មុន។ Juventus បានចំណាយ ១២ លានអឺរ៉ូក្នុងការទិញយក Perin ដែលបានចុះកុងត្រារយៈពេល ៤ ឆ្នាំជាមួយពួកគេ។
បុរសវ័យ ៤០ ឆ្នាំ Buffon បានចំណាយពេល ១៧ ឆ្នាំលេងនៅ Juventus ប៉ុន្តែគាត់ទំនងជានឹងទៅលេងឲ្យក្លិបមួយផ្សេងទៀត បន្ទាប់ពីអតីតអ្នកចាំទីរបស់ក្រុមជម្រើសជាតិអ៊ីតាលីរូបនេះបានដូរគំនិតវិញទាក់ទងនឹងការហាលស្រោមដៃរបស់ខ្លួន។ ចំណែកអ្នកចាំទីចំណូលថ្មីរបស់ Juventus, Perin ដែលពេលនេះទើបតែមានវ័យ ២៥ ឆ្នាំរូបនេះវិញបានចំណាយពេល ៨ ឆ្នាំចាំឲ្យក្រុម Genoa ដែលបានឈរលើចំណាត់ថ្នាក់លេខ ១២ ក្នុងតារាងនៃក្របខ័ណ្ឌកំពូលរបស់អ៊ីតាលី «Serie A» ក្រោយពីការបិទរដូវកាល។
ទន្ទឹមគ្នានេះដែរ Juventus ដែលបានចុះហត្ថលេខាទិញយកខ្សែបម្រើស្លាប Douglas Costa ពីក្រុម Bayern Munich ក្រោយខ្ចីជើងបានមួយរដូវកាលមួយនេះក៏ត្រូវបានគេផ្សាភ្ជាប់ជាមួយការផ្ទេរខ្សែបម្រើ Emre Can របស់ក្រុមហង្សក្រហម Liverpool ផងដែរ បន្ទាប់ពីក្រុមនៃលីកកំពូលរបស់អង់គ្លេសមួយនេះប្រកាសថាគាត់នឹងចាកចេញពីក្លិបនារដូវក្ដៅនេះ។
ប្រែសម្រួល ៖ ភក្ដី
