អ្នកចាត់ការថ្មីរបស់ក្លិប Everton លោក Marco Silva បានមានប្រសាសន៍ថាទ្វារនៅ Everton គឺនៅតែបើកសម្រាប់ខ្សែប្រយុទ្ធ Wayne Rooney បើគាត់ចង់ស្នាក់នៅបន្ត បើទោះបីជាអតីតកីឡាកររបស់ក្រុមបិសាចក្រហម Manchester United រូបនេះហាក់មានទំនោរចង់ផ្លាស់ទៅលេងឲ្យក្លិបនៃលីកកំពូលរបស់សហរដ្ឋអាមេរិក DC United ក៏ដោយ។
បុរសវ័យ ៣២ ឆ្នាំ Rooney ត្រូវបានគេដឹងថាគាត់បានព្រមព្រៀងគ្នាជាមួយ DC United ទាំងដែលកុងត្រារបស់គាត់ជាមួយ Everton នៅសល់មួយឆ្នាំទៀតទើបផុត។ ហើយថ្លែងនៅក្នុងសន្និសីទកាសែតលើកដំបូងរបស់ខ្លួនក្នុងនាមជាគ្រូបង្វឹក Everton លោក Silva បាននិយាយថាលោកមានការគោលដៅទិញកីឡាករល្បីៗមួយចំនួនបន្ថែមឲ្យ Everton ខណៈដែលគាត់នៅតែមិនបដិសេធឡើយ បើ Rooney ចង់ស្នាក់បន្ត។
“Rooney គឺជាវីរបុរសមួយរូបរបស់ក្លិប ហើយយើងត្រូវតែយល់ពីអ្វីៗគ្រប់យ៉ាងទាំងនោះ។” Silva បាននិយាយ។ “ហើយទ្វារនៅ Everton គឺនៅតែចំហជានិច្ចសម្រាប់គាត់។” Silva គឺជាជនទី ៣ ដែលបានមកកាន់តំណែងជាអ្នកចាត់ការនៅ Everton បន្ទាប់ពីក្លិបនៃលីកកំពូលរបស់អង់គ្លេសមួយនេះបានចែកផ្លូវគ្នាជាមួយគ្រូបង្វឹកដល់ទៅ ២ រូបក្នុងរយៈពេលមិនដល់មួយឆ្នាំ ដែលពួកគេទាំង ២ នោះគឺលោក Ronald Koeman និងលោក Allardyce ដែល Everton សុំចែកផ្លូវកាលពីខែមុន។
ប្រែសម្រួល ៖ ភក្ដី