ខ្សែការពារឆ្នើមរបស់ក្រុមជម្រើសជាតិអេស្ប៉ាញ និងក្រុមយក្សស Real Madrid កីឡាករ Sergio Ramos បានបញ្ចេញចម្រៀងផ្ទាល់ខ្លួនមួយបទដោយច្រៀងរួមគ្នាជាមួយតារាចម្រៀងអេស្ប៉ាញ Demarco Flamenco ខណៈដែលចម្រៀងនោះដែរគឺទាក់ទងជាមួយនឹងព្រឹត្តិការណ៍នៃការប្រកួតពានរង្វាន់បាល់ទាត់ពិភពលោកឆ្នាំ ២០១៨ នេះ និងមានចំណងជើងថា ” Otra Estrella en tu Corazon ” ដែលន័យជាភាសាអង់គ្លេសគឺប្រែថា ” Another star in your heart (តារាផ្សេងទៀតនៅក្នុងដួងចិត្តអ្នក)” ។
Ramos ដែលដើរតួជាប្រធានក្រុមទាំងនៅជម្រើសជាតិ និងក្លិបរូបនេះបានបង្ហោះវីដេអូចម្រៀងរយៈពេលខ្លីចូលទៅក្នុងបណ្ដាញសង្គម Instagram របស់ខ្លួន ខណៈដែលមកទល់ពេលនេះគឺមានអ្នកចុចមើលដល់ជាង ១ លាននាក់ទៅហើយ។ យ៉ាងណាមិញនេះមិនមែនជាលើកទីមួយសម្រាប់កីឡាករវ័យ ៣២ ឆ្នាំរូបនេះនោះទេដែលគាត់ដើរលើវីថីសិល្បៈចម្រៀង។ តួយ៉ាងគឺគាត់ធ្លាប់ស្រែកច្រៀងនាំមុខឲ្យក្រុមជម្រើសជាតិអេស្ប៉ាញអំឡុងព្រឹត្តិការណ៍ Euro 2016 ។
