ភ្នំពេញ៖ នាព្រឹកថ្ងៃពុធ ០៥រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី២៤ ខែមេសា ឆ្នាំ២០១៩នេះ ឯកឧត្តម ឃួង ស្រេង អភិបាលរាជធានីភ្នំពេញ និងទីភ្នាក់ងារសហប្រតិបត្តិការអន្តរជាតិជប៉ុន JICA បាន ប្រជុំពិភាក្សា លើគម្រោង សាងសង់ស្ថានីយប្រព្រឹត្តិកម្មទឹកស្អាត ដែលគម្រោងនេះ មានទឹកប្រាក់ប្រមាណ ២៥ លានដុល្លារ ស្ថិតនៅភាគខាងត្បូងរាជធានីភ្នំពេញ។
ប្រជុំពិភាក្សាការងាររវាង ឯកឧត្តម ឃួង ស្រេង អភិបាល អភិបាលរាជធានីភ្នំពេញ និងទីភ្នាក់ងារសហប្រតិបត្តិការអន្តរជាតិជប៉ុន JICA បានពិភាក្សាអំពីបញ្ហាដីសម្រាប់ការរត់បណ្ដាញខ្សែលូរបស់រោងចក្រប្រព្រឹត្តកម្មទឹកស្អុយសម្រាប់ ” គម្រោងអភិវឌ្ឍន៍ប្រព័ន្ធលូបង្ហូរទឹកកខ្វក់ក្នុងរាជធានីភ្នំពេញ ” ដើម្បីដោះស្រាយនូវបញ្ហាកង្វក់ទឹកនៅក្នុងរាជធានីភ្នំពេញ ។
រដ្ឋបាលរាជធានីភ្នំពេញបានសម្រេចសាងសង់ស្ថានីយ៍ប្រព្រឹត្តកម្មទឹកកខ្វក់ទី១ ស្ថិតនៅភាគខាងត្បូងរាជធានីភ្នំពេញ ដោយបានកំណត់យកតំបន់ជើងឯក សម្រាប់សាងសង់ស្ថានីយ៍ ក្រោមជំនួយឥតសំណងរបស់ រាជរដ្ឋាភិបាលប្រទេសជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន JICA។
ក្នុងកិច្ចប្រជុំនោះ ឯកឧត្តម ឃួង ស្រេង បានឯក ភាព ឲ្យ មន្ទីរសាធារណការនិងដឹកជញ្ជូន រាជធានីភ្នំពេញ និងមន្ទីរដែនដីនគររូបនីយកម្ម សំណង់ និងសុរិយោដីរាជធានី ចុះបោះបង្គោលព្រំនិងកាយអាចម៍ដី ដែលចាក់ រំលោភប្រឡាយ យកដីចាក់តាមព្រំប្រឡាយ ដើម្បីទុកឲ្យអង្គការចៃកាទៅតាម តម្រូវការរបស់អង្គការនេះ។
គម្រោង សាងសង់ស្ថានីយប្រព្រឹត្តិកម្មទឹកស្អាត ជាជំនួយឥតសំណង របស់ជប៉ុន ដែលមានទឹក ប្រាក់ប្រមាណ២៥លានដុល្លារសហរដ្ឋអាមេរិក ជាគម្រោងដែលមិនធ្លាប់មានរបស់ភាគីជប៉ុន ក្នុងកសាង ប្រឡាយលូ នៅក្នុងរាជធានីភ្នំពេញ៕ដោយ សុខជា
